കാബൂള്‍: ഖത്തറില്‍ സമാധാന ചര്‍ച്ചകള്‍ പുരോഗമിക്കുന്നതിനിടെ അഫ്ഗാനിസ്ഥാനില്‍ വീണ്ടും താലിബാന്‍ ആക്രമണം. ഗസ്‌നി നഗരത്തിലെ സര്‍ക്കാര്‍ കെട്ടിടത്തിനു സമീപമുണ്ടായ കാര്‍ ബോംബ് സ്‌ഫോടനത്തില്‍ ആറ് സാധാരണക്കാരുള്‍പ്പെടെ 14 പേര്‍ കൊല്ലപ്പെട്ടു. 140ലേറെ പേര്‍ക്ക് പരുക്കുണ്ട്. ദേശീയ സുരക്ഷാ വിഭാഗത്തിന്റെ പ്രധാന ഇന്റലിജന്‍സ് യൂനിറ്റ് പ്രവര്‍ത്തിക്കുന്ന കെട്ടിടമാണ് താലിബാന്‍ ലക്ഷ്യമിട്ടത്. ഇന്നലെ രാവിലെ ജനത്തിരക്കുള്ള സമയത്താണ് ബോംബ് പൊട്ടിയതെന്ന് ഉദ്യോഗസ്ഥര്‍ പറഞ്ഞു. കൊല്ലപ്പെട്ടവരില്‍ ഒരു കുട്ടിയും ഉള്‍പ്പെടുന്നു.