തൊടുപുഴ: മൃഗങ്ങള്‍ക്കെതിരെയുള്ള ക്രൂരത തടയുന്നതിനായി രൂപീകൃതമായതാണ് എസ്.പി.സി. എ (സോഷ്യല്‍ പ്രിവന്‍ഷന്‍ ഓഫ് ക്രൂവല്‍റ്റി ടു ആനിമല്‍സ്). അക്രമകാരികളായ തെരുവുനായ്ക്കളുടെ ശല്യം കുറയ്ക്കാന്‍ എസ്.പി.സി.എ നേരത്തെ പദ്ധതികള്‍ തയ്യാറാക്കിയിരുന്നെങ്കിലും ഇപ്പോള്‍ എല്ലാം നിര്‍ജീവമായി. നായ്ക്കളെ പിടികൂടുന്നതിന് ചെന്നൈ ബ്ലുക്രോസ് ഓഫ് ഇന്‍ഡ്യയില്‍ നിന്ന് മൂന്നര അടി പൊക്കവും അഞ്ചര അടി നീളവുമുള്ള കെണി നേരത്തെ തൊടുപുഴയിലെത്തിച്ചിരുന്നു. കൂടാതെ പ്രത്യേകതരം കുടുക്ക് ഉപയോഗിച്ച് നായ്ക്കളെ പിടികൂടുന്നതിന് പരിശീലനം സിദ്ധിച്ച തൊഴിലാളികളെയും എസ്.പി.സി.എ നിയോഗിച്ചിരുന്നു. എന്നാല്‍ ഇപ്പോള്‍ ആരേയും കാണാനില്ല.
1960-ല്‍ പാര്‍ലമെന്റില്‍ മൃഗങ്ങള്‍ക്കെതിരെയുള്ള ക്രൂരത തടയുന്നതിനായി നിയമം പാസാക്കുകയും ഇന്ത്യയിലെ എല്ലാ ജില്ലകളിലും എസ്.പി. സി.എ സ്ഥാപിച്ച് ഇതിന്റെ പ്രവര്‍ത്തനം വ്യാപിപ്പിക്കുകയും ചെയ്തിരുന്നു. ഓരോ ജില്ലയിലും ജില്ലാ കലക്ടര്‍മാര്‍ ചെയര്‍മാനും ജില്ലാ പൊലിസ് മേധാവി വൈസ് ചെയര്‍മാനുമാണ്. ജില്ലാ വെറ്ററിനറി ഓഫീസര്‍ ഹോണററി സെക്രട്ടറിയായി രൂപീകരിക്കപ്പെടുന്ന സമിതിയാണ് എസ്.പി.സി.എയുടെ ജില്ലാതല പ്രവര്‍ത്തനങ്ങള്‍ നിയന്ത്രിക്കുന്നത്.
തെരുവില്‍ അലഞ്ഞു നടന്ന നായ്ക്കളെ എസ്.പി.സി.എ അധികൃതര്‍ പിടികൂടി വന്ധ്യംകരണ ശസ്ത്രക്രിയ നടത്തി ഒരാഴ്ചയോളം പരിപാലിച്ചശേഷം പിടികൂടിയ സ്ഥലത്ത് കൊണ്ടുപോയി വിടുകയാണ് ചെയ്തിരുന്നത്. തെരുവുനായ്ക്കളെ ഇപ്രകാരം പിടികൂടി വന്ധ്യംകരണ ശസ്ത്രക്രിയ നടത്തുന്നതിന് കേന്ദ്രഗവണ്‍മെന്റ് അനിമല്‍ വെല്‍ഫെയര്‍ ബോര്‍ഡ് ഓഫ് ഇന്ത്യ മുഖേന ഒരു നായയ്ക്ക് 445 രൂപയോളമാണ് നല്‍കിവരുന്നത്.