തേസ്പുര്‍: പതിവ് പരിശീലന പറക്കലിനിടയില്‍ കാണാതായ വ്യോമസേനയുടെ സുഖോയ്-30 വിമാനത്തിനായുള്ള തിരച്ചില്‍ താല്‍ക്കാലികമായി നിര്‍ത്തിവച്ചു. മോശം കാലാവസ്ഥയെ തുടര്‍ന്നാണ് തിരച്ചില്‍ നിര്‍ത്തിയതെന്ന് അധികൃതര്‍ അറിയച്ചതായി എ.എന്‍.ഐ റിപ്പോര്‍ട്ട് ചെയ്തു. വിമാനത്തിലുണ്ടായിരുന്ന രണ്ട് പൈലറ്റുമാരുടെ വിവരങ്ങള്‍ ഇതുവരെ ലഭ്യമായിട്ടില്ലെന്ന് വ്യോമസേന അറിയിച്ചു.
ചൊവ്വാഴ്ച അസമിലെ തേസ്പുരില്‍ ചൈനീസ് അതിര്‍ത്തിയിലാണ് പരിശീലന പറക്കലിനിടെ വിമാനം കാണാതായത്. അരുണാചല്‍ പ്രദേശിലെ ഡോലാസാങ് മേഖലയിലൂടെ പറക്കുമ്പോള്‍ വിമാനവുമായുള്ള റഡാര്‍, റേഡിയോ ബന്ധം നഷ്ടമാവുകയായിരുന്നു. ഉടന്‍ തന്നെ വിമാനത്തിനായുള്ള തിരച്ചില്‍ വ്യോമസേന ആരംഭിച്ചിരുന്നു. ചൈനാ അതിര്‍ത്തിയില്‍ നിന്ന് 172 കിലോമീറ്റര്‍ ദൂരെയാണ് തേസ്പൂര്‍ വ്യോമസേനാ താവളം. റഷ്യന്‍ നിര്‍മിത യുദ്ധവിമാനമാണ് സുഖോയ്-30.