കൊച്ചി : ഐലീഗിലെ മികച്ച ഗോള്‍കീപ്പര്‍മാരില്‍ ഒരാളായ ബിലാല്‍ ഹുസൈന്‍ ഖാന്‍ കേരള ബ്ലാസ്റ്റേഴ്‌സില്‍. ഇന്ത്യന്‍ സൂപ്പര്‍ ലീഗിന്റെ 2019-20 സീസണിലേക്കാണ് ബിലാല്‍ ഖാന്‍ കേരള ബ്ലാസ്റ്റേഴ്‌സിനായി കളിക്കുക. 2017-18 ഐലീഗില്‍ ഗോകുലം കേരള എഫ്.സിക്ക് വേണ്ടി കളിച്ച ബിലാല്‍ ഖാന്‍ കേരളത്തിന് അപരിചിതനല്ല. ഐലീഗ് 2018-19 സീസണിലെ മികച്ച ഗോള്‍കീപ്പറായി ബിലാല്‍ ഖാന്‍ തിരഞ്ഞെടുക്കപ്പെട്ടിരുന്നു. കൂടാതെ ഏറ്റവും കൂടുതല്‍ ക്ലീന്‍ ഷീറ്റിനുള്ള ഗോള്‍ഡന്‍ ഗ്ലൗവ് പുരസ്‌കാരവും ബിലാല്‍ സ്വന്തമാക്കിയിരുന്നു. 194സെന്റിമീറ്റര്‍ ഉയരമുള്ള ബിലാല്‍ ഖാന്‍ ഏറ്റവും മികച്ച യുവ ഇന്ത്യന്‍ ഗോളികളില്‍ ഒരാളാണ്. ഉത്തര്‍പ്രദേശ് സ്വദേശിയായ ബിലാല്‍ ഖാന്‍ മുന്‍പ് ഐ.എസ്.എല്‍ ടീമായ എഫ്.സി പൂനെ സിറ്റിയുമായി കരാറിലേര്‍പ്പെട്ടിരുന്നു.

തുടര്‍ന്ന് 2018-19 സീസണിന്റെ തുടക്കത്തില്‍ പുതുതായി ആരംഭിച്ച ഐലീഗ് ടീമായ റിയല്‍ കശ്മിര്‍ എഫ്.സിക്കുവേണ്ടി കളിച്ചു. ടീമിനായി കളിച്ച 19 മത്സരങ്ങളില്‍ നിന്ന് മികച്ച സേവുകള്‍ നടത്തി ബിലാല്‍ ശ്രദ്ധ നേടിയിരുന്നു. ചര്‍ച്ചില്‍ ബ്രദേഴ്‌സ് എസ് സി, ഹിന്ദുസ്ഥാന്‍ എഫ്‌സി, മുഹമ്മദന്‍ എഫ്‌സി, സാല്‍ഗോക്കര്‍ എഫ്‌സി എന്നീ ടീമുകളിലും ഈ 24 വയസുകാരന്‍ മുമ്പ് കളിച്ചിട്ടുണ്ട്.