ഗൂഡല്ലൂര്‍: തെപ്പക്കാട് ആന ക്യാംപിന് സമീപത്തെ മസിനഗുഡി റോഡിലേക്കുള്ള പാലവുമായി ബന്ധപ്പെട്ട് വനംവകുപ്പും ദേശീയപാതാ വിഭാഗവും തമ്മിലുള്ള പ്രശ്‌നങ്ങള്‍ക്ക് പരിഹാരം.
ഇതോടെ ആശ്വാസമാകുന്നത് നൂറ്റാണ്ടുകള്‍ പഴക്കമുള്ള പാലത്തിലൂടെ ജീവന്‍ പണയംവെച്ച് യാത്ര ചെയ്യുന്ന നൂറുകണക്കിന് യാത്രക്കാര്‍ക്ക്. വീതി കുറഞ്ഞ ഈ പാലത്തിലൂടെ ഒരേസമയം ഒരു ഭാഗത്ത് നിന്ന് മാത്രമാണ് വാഹനങ്ങള്‍ കടുന്നുപോകാന്‍ സാധിക്കുക. കാലപ്പഴക്കത്താല്‍ പാലം അപകടഭീഷണിയിലുമായിരുന്നു. സഞ്ചാരികളടക്കം ദിനേന 100ലധികം വലുതും ചെറുതുമായ വാഹനങ്ങളാണ് ഈ പാലത്തിലൂടെ കടന്നുപോകുന്നത്. പാലത്തിന്റെ അപകടാവസ്ഥ ശ്രദ്ധയില്‍പ്പെട്ടതോടെയാണ് ദേശീയപാതാ വിഭാഗം പാലം പുതുക്കി പണിയാനുള്ള തീരുമാനത്തിലെത്തിയത്. ഇതിനായി നടപടികള്‍ പുരോഗമിക്കവെയാണ് എതിര്‍വാദവുമായി വനംവകുപ്പ് രംഗത്തെത്തിയത്. പാലം പൂര്‍ണമായും പൊളിച്ച് നീക്കി പുതിയ പാലം നിര്‍മിക്കുമ്പോള്‍ മസിനഗുഡി ഭാഗത്തേക്ക് പോകുന്ന വാഹനങ്ങള്‍ക്കായി വനത്തിലൂടെ താല്‍ക്കാലിക ബദല്‍പാത നിര്‍മിക്കേണ്ടതായി വരും. എന്നാല്‍ ഇത് അംഗീകരിക്കാന്‍ കഴിയില്ലെന്ന നിലപാടിലായിരുന്നു വനംവകുപ്പ്. ഇതോടെയാണ് പാലം പുനര്‍നിര്‍മിക്കുന്നത് അനിശ്ചിതമായി നീണ്ടത്. ചര്‍ച്ചയില്‍ പ്രശ്‌നം പരിഹരിക്കപ്പെട്ടതോടെയാണ് നിര്‍മാണ പ്രവൃത്തികള്‍ ആരംഭിക്കാനുള്ള നടപടികള്‍ ദേശീയപാതാ വിഭാഗം കൈകൊണ്ടത്. വാഹനങ്ങള്‍ക്ക് കടന്നു പോകാന്‍ ബദല്‍ സംവിധാനം പൂര്‍ത്തിയായാല്‍ പാലത്തിന്റെ പുനര്‍നിര്‍മാണം ആരംഭിക്കുമെന്ന് ദേശീയപാതാ അധികൃതര്‍ പറഞ്ഞു.