മസ്‌കത്: ഇന്ത്യക്കാര്‍ക്ക് ഇനി വിസയില്ലാതെ ഒമാനില്‍ പ്രവേശിക്കുകയും 10 ദിവസത്തോളം താമസിക്കുകയും ചെയ്യാം. ഇന്ത്യ ഉള്‍പ്പെടെ 103 രാജ്യങ്ങളിലെ പൗരന്മാര്‍ക്കാണ് വിസയില്ലാതെ ഒമാനില്‍ പ്രവേശിക്കാന്‍ അനുമതി നല്‍കിയിരിക്കുന്നത്. മലേഷ്യ, ലബനാന്‍, തായ്‌ലന്‍ഡ്, ഭൂട്ടാന്‍, ജോര്‍ദാന്‍, താജികിസ്ഥാന്‍, മകാവു, ഇറാന്‍, ബ്രൂണെയ് എന്നീ ഏഷ്യന്‍ രാജ്യങ്ങളും വിസാ ഇളവ് നല്‍കുന്ന പട്ടികയില്‍ ഉള്‍പ്പെട്ടിട്ടുണ്ട്.

കൂടുതല്‍ വിനോദസഞ്ചാരികളെ ആകര്‍ഷിക്കാനും ഒമാന്‍ സന്ദര്‍ശിക്കാനാഗ്രഹിക്കുന്നവര്‍ക്ക് നടപടിക്രമങ്ങള്‍ എളുപ്പമാക്കാനും ലക്ഷ്യമിട്ടാണ് തീരുമാനം. പ്രത്യേക നിബന്ധനകള്‍ക്കും നിയന്ത്രണങ്ങള്‍ക്കും വിധേയമായിട്ടായിരിക്കും പ്രവേശനം.

നേരത്തെ തന്നെ ബുക്ക് ചെയ്ത ഉറപ്പാക്കിയ ഹോട്ടല്‍ റിസര്‍വേഷന്‍, ആരോഗ്യ ഇന്‍ഷുറന്‍സ്, മടങ്ങിപ്പോകാനുള്ള ടിക്കറ്റ് തുടങ്ങിയവയാണ് പ്രവേശന നിബന്ധനകള്‍.