ചെന്നൈ: കുറ്റപ്പെടുത്തലുകള്‍ക്കിടയിലും ധോണിയെ കൈവിടാതെ ചെന്നൈ സൂപ്പര്‍ കിങ്‌സ്. ലോകകപ്പിലെ പരാജയത്തെ തുടര്‍ന്ന് താരത്തിനെതിരേ കടുത്ത വിമര്‍ശനങ്ങള്‍ ഉയര്‍ന്ന് വന്നിരുന്നു. എന്നാല്‍ ഈ വിമര്‍ശനങ്ങള്‍ക്കൊന്നും ധോണിയുടെ കഴിവിനെ കുറക്കാനായിട്ടില്ല.
2020ല്‍ നടക്കുന്ന ഐ.പി.എല്ലിന് ചെന്നൈ സൂപ്പര്‍ കിങ്‌സിനെ ധോണി തന്നെ നയിക്കുമെന്നാണ് ചെന്നൈ സൂപ്പര്‍ കിങ്‌സ് ഉടമകള്‍ അറിയിച്ചത്. ലോകകപ്പ് സെമിയില്‍ ന്യൂസിലന്‍ഡിനോടേറ്റ തോല്‍വിയോടെ ധോണി ക്രിക്കറ്റില്‍നിന്ന് വിരമിക്കുമെന്ന് വാര്‍ത്തകള്‍ ഉ@ണ്ടായിരുന്നു. എന്നാല്‍ ധോണിയോ ബി.സി.സി.ഐയോ ഇതിനോട് ഇതുവരെ പ്രതികരിച്ചിട്ടില്ല. ഇന്ത്യന്‍ ക്യാപ്റ്റന്‍ വിരാട് കോഹ്‌ലിയും ധോണിയുടെ വിരമിക്കലിനെ പറ്റി തനിക്ക് അറിവില്ലെന്ന് നേരത്തെ വ്യക്തമാക്കിയിരുന്നു. അതേസമയം, ഇതുവരെ വിരമിക്കല്‍ പ്രഖ്യാപനം ധോണി നടത്തിയിട്ടില്ലെങ്കിലും ഇന്ത്യയുടെ അടുത്ത പരമ്പരയായ വെസ്റ്റ് ഇന്‍ഡീസ് പര്യടനത്തിന് ധോണി ഇന്ത്യന്‍ ടീമിനൊപ്പം ഉണ്ടാവില്ല എന്നാണ് സൂചനകള്‍. വിരാട് കോഹ്‌ലി, ജസ്പ്രീത് ബുംറ എന്നിവരും വിന്‍ഡീസ് പര്യടനത്തില്‍ ഇന്ത്യക്കൊപ്പമുണ്ടാവില്ല.