പാറക്കടവ്:  കോഴിക്കോട് ജില്ലയില്‍ ഏറ്റവും കൂടുതല്‍ ഡിഫ്തീരിയ രോഗം റിപ്പോര്‍ട്ട് ചെയ്ത തൂണേരി ബ്ലോക്ക് പഞ്ചായത്ത് പരിധിയില്‍ ആരോഗ്യ വകുപ്പിന്റെ പ്രവര്‍ത്തനം അവതാളത്തില്‍. ആശുപത്രികളില്‍ പരിചയ സമ്പന്നരായ ഡോക്ടര്‍മാരുടെ അഭാവത്തില്‍ എന്‍.ആര്‍. എച്ച്. എം മുഖേന നിയമിക്കുന്ന താത്ക്കാലിക ഡോക്ടര്‍മാരെ വച്ചാണ് ചികിത്സ നടത്തി വരുന്നത്. ആരോഗ്യ വകുപ്പില്‍ ജീവനക്കാരുടെ അഭാവവും പ്രതിസന്ധി സൃഷ്ടിച്ചിട്ടുണ്ട് . ഡിഫ്തീരിയ ബാധിച്ച പ്രദേശങ്ങളില്‍ മുഴുവന്‍ ആളുകളും പ്രതിരോധ കുത്തിവയ്പ്പ് എടുക്കണമെന്നിരിക്കെ തിരിച്ചറിഞ്ഞ രോഗിയുടെ ചുറ്റുമുള്ള 100 വീടുകളില്‍ മാത്രമാണ് ഇപ്പോള്‍ വാക്‌സിന്‍ നല്‍കുന്നത്. ആളുകള്‍ കുത്തിവയ്പ്പിന് തയാറാണെങ്കിലും ഹെല്‍ത്ത് സെന്ററിലെത്തുന്നവരെ നിരുത്സാഹപെടുത്തി തിരിച്ചെയക്കുകയാണ് ചെയ്യുന്നത്. സ്‌കൂള്‍ കുട്ടികള്‍ക്ക് മാത്രമായി  കുത്തിവയ്പ്പ് നടത്താനാണ് സര്‍ക്കാര്‍ നീക്കം. എന്നാല്‍ ഒരു വയസ്സ് മാത്രം പ്രായമുള്ള കുട്ടിക്ക് രോഗം ബാധിച്ച സാഹചര്യത്തില്‍ സ്‌കൂളില്‍ മാത്രം കുത്തിവയ്പ്പ് നടത്താനുള്ള നീക്കം ഫലപ്രദമല്ല. കുത്തിവയ്പ്പിനുള്ള ക്ഷാമവും പ്രതിരോധ പ്രവര്‍ത്തനത്തെ  പ്രതികുലമായി ബാധിച്ചിട്ടുണ്ട്.