HOME
DETAILS

സൗജന്യമായി മദ്യം നല്‍കിയില്ല; ഗുണ്ടാസംഘം ബാര്‍ അടിച്ചുതകര്‍ത്തു

  
backup
October 01 2018 | 00:10 AM

%e0%b4%b8%e0%b5%97%e0%b4%9c%e0%b4%a8%e0%b5%8d%e0%b4%af%e0%b4%ae%e0%b4%be%e0%b4%af%e0%b4%bf-%e0%b4%ae%e0%b4%a6%e0%b5%8d%e0%b4%af%e0%b4%82-%e0%b4%a8%e0%b4%b2%e0%b5%8d%e2%80%8d%e0%b4%95%e0%b4%bf%e0%b4%af

താമരശേരി: ചുങ്കത്തു പ്രവര്‍ത്തിക്കുന്ന ബാറില്‍ മദ്യപിക്കാനെത്തിയ ഗുണ്ടാസംഘം സൗജന്യമായി മദ്യം നല്‍കാത്തതിനെ തുടര്‍ന്ന് ബാര്‍ അടിച്ചുതകര്‍ത്തു. തടയാന്‍ ശ്രമിച്ച സെക്യൂരിറ്റി ജീവനക്കാരെ മര്‍ദിക്കുകയും ചെയ്തു. തൃശൂര്‍ സ്വദേശി ടി.പി ഉണ്ണികൃഷ്ണന്റെ ഉടമസ്ഥതയിലുള്ള ഹസ്തിനപുരി ബാറില്‍ ശനിയാഴ്ച രാത്രി 11.30നാണ് സംഭവം.
എട്ടോളം വരുന്ന സംഘം ശനിയാഴ്ച ബാറിലെത്തുകയും മദ്യപിക്കുകയുമായിരുന്നു. തുടര്‍ന്ന് മദ്യം സൗജന്യമായി നല്‍കണമെന്ന് ജീവനക്കാരോട് ആവശ്യപ്പെട്ടു. എന്നാല്‍ മദ്യം നല്‍കാത്തതിനെ തുടര്‍ന്ന് ഇവര്‍ റിസപ്ഷന്‍ കൗണ്ടറില്‍ പ്രവേശിക്കുകയും ഫര്‍ണിച്ചറുകളും ടെലഫോണുകളും കംപ്യൂട്ടറുകളും അടിച്ചുതകര്‍ക്കുകയുമായിരുന്നു. സംഭവമറിഞ്ഞ് അക്രമിസംഘത്തെ തടയാനെത്തിയ ബാറിലെ സെക്യൂരിറ്റി ജീവനക്കാരായ ഹരിദാസന്‍, രാജന്‍ എന്നിവരെ സംഘം വളഞ്ഞിട്ട് ആക്രമിച്ചു. അക്രമിസംഘം കരുതിയ ആയുധങ്ങളും ബാറിലെ ഫര്‍ണിച്ചറുകളുമെടുത്ത് ബാറിന്റെ ചില്ലുകള്‍ വ്യാപകമായി നശിപ്പിക്കുകയും ചെയ്തിട്ടുണ്ട്.
ബാര്‍ അടക്കുന്ന സമയത്തിനു തൊട്ടുമുന്‍പ് എത്തിയ സംഘം മനഃപൂര്‍വം പ്രശ്‌നങ്ങള്‍ സൃഷ്ടിക്കുകയായിരുന്നെന്ന് ബാര്‍ ജീവനക്കാര്‍ പറഞ്ഞു.
ജീവനക്കാര്‍ വിവരമറിയിച്ചതിനെ തുടര്‍ന്ന് സ്ഥലത്തെത്തിയ പൊലിസ് നാലുപേരെ അറസ്റ്റ് ചെയ്തു. മറ്റു നാലുപേര്‍ ഓടിരക്ഷപ്പെട്ടു. അമ്പായത്തോട് മിച്ചഭൂമിയില്‍ താമസിക്കുന്ന കാറ്റാടിക്കുന്ന് വീട്ടില്‍ സുബിത്ത് (26), പിലാക്കണ്ടി ബിപിന്‍ലാല്‍ (27), ചമ്പ്രക്കാട്ട് പുറായില്‍ ബിജീഷ് (27), ആനപ്പാറ പൊയില്‍ പ്രവീണ്‍ (32) എന്നിവരെയാണ് പൊലിസ് അറസ്റ്റ് ചെയ്തത്.
ഇവര്‍ക്കെതിരേ അതിക്രമിച്ചു കടക്കല്‍, മര്‍ദനം, ആയുധം കൈവശംവയ്ക്കല്‍, സംഘംചേരല്‍ തുടങ്ങിയ വകുപ്പുപ്രകാരം കേസെടുത്തിട്ടുണ്ട്. താമരശേരി കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു. ഏകദേശം നാലു ലക്ഷം രൂപയുടെ നഷ്ടം കണക്കാക്കുന്നതായി ഉടമകള്‍ അറിയിച്ചു.



Comments (0)

Disclaimer: "The website reserves the right to moderate, edit, or remove any comments that violate the guidelines or terms of service."