മനാമ: സോഷ്യല്‍ മീഡിയ വഴി മയക്കുമരുന്ന് കച്ചവടം നടത്തി വന്ന നാലംഗ സംഘത്തെ ബഹ്‌റൈന്‍ പൊലിസ് പിടികൂടിയതായി റിപ്പോര്‍ട്ട്. പൊലിസിന്റെ സ്റ്റിങ് ഓപറേഷന്‍ വഴിയാണ് ഒരു ഏഷ്യന്‍ വംശജനും മൂന്നു സ്ത്രീകളും അടങ്ങുന്ന സംഘം പിടിയിലായതെന്ന് ബന്ധപ്പെട്ടവര്‍ അറിയിച്ചു. എന്നാല്‍, അന്വേഷണം പുരോഗമിക്കുന്നതിനാല്‍ ഇവരുടെ പേരു വിവരങ്ങള്‍ പുറത്തുവിട്ടിട്ടില്ല.
സോഷ്യല്‍ മീഡിയ വഴി മയക്കുമരുന്നു കച്ചവടം നടത്തുകയും ആകര്‍ഷണീയമായ വാഗ്ദാനങ്ങള്‍ നല്‍കി മറ്റുള്ളവരെ പ്രോത്സാഹിപ്പിക്കുകയും ചെയ്തിരുന്ന സംഘാംഗങ്ങളില്‍ ചിലര്‍ മയക്കുമരുന്നിന് അടിമകളാണെന്നും കണ്ടെത്തിയിട്ടുണ്ട്.

ഷബു എന്നറിയപ്പെടുന്ന ഒരുതരം ക്രിസ്റ്റല്‍ രൂപത്തിലുള്ള മയക്കുമരുന്ന് പ്രതികള്‍ ബഹ്‌റൈനില്‍ എത്തിച്ച് ആവശ്യാനുസരണം ഉപഭോക്താക്കള്‍ക്ക് പ്രത്യേക രീതിയില്‍ എത്തിച്ചുകൊടുക്കുകയാണ് ഇവരുടെ രീതിയെന്ന് പൊലിസ് അറിയിച്ചു.
ബഹ്‌റൈനിലെ അദ്‌ലിയ കേന്ദ്രീകരിച്ചാണ് പ്രധാനമായും മയക്കുമരുന്ന് കച്ചവടം നടന്നിരുന്നത്. ആവശ്യക്കാര്‍ പണം അടയ്ക്കുന്നതിനനുസരിച്ചു മയക്കുമരുന്ന് നിറച്ച ബാഗുകള്‍ ഓരോ സ്ഥലങ്ങളില്‍ ഇവര്‍ നിക്ഷേപിക്കും. പിന്നീട് സോഷ്യല്‍ മീഡിയ വഴിയുള്ള സന്ദേശങ്ങള്‍ വഴി ഉപഭോക്താക്കള്‍ സ്ഥലം മനസിലാക്കി മയക്കുമരുന്ന് ശേഖരിക്കുകയും ചെയ്യുന്ന രീതിയായിരുന്നു ഇവര്‍ സ്വീകരിച്ചിരുന്നതെന്നും പൊലിസ് പറഞ്ഞു.
അതേസമയം, അറസ്റ്റിലായ ഏഷ്യന്‍ വംശജന്റെ മൊഴി അനുസരിച്ച് ഒന്നാം പ്രതിയായ സ്ത്രീയുടെ പക്കല്‍ നിന്നാണ് ഇയാള്‍ക്ക് മയക്കുമരുന്ന് ലഭിച്ചുകൊണ്ടിരുന്നത്. ഇവര്‍ മയക്കുമരുന്ന് വിതരണം നടത്താനായി സ്ത്രീകളുടെ ഹാന്‍ഡ് ബാഗാണ് ഉപയോഗിച്ചിരുന്നതെന്നു പൊലിസ് പറഞ്ഞു.
ഇതടിസ്ഥാനമാക്കി സ്റ്റിങ് ഓപറേഷന്റെ ഭാഗമായി മയക്കുമരുന്ന് വാങ്ങാനെന്ന വ്യാജേനെ പൊലിസ് ഓഫിസര്‍ തന്നെയാണ് ഇവരുടെ അടുത്തു എത്തിയത്. ബഹ്‌റൈന്‍ ദിനാര്‍ 500 (ഏകദേശം 88,500 രൂപ) നിരക്കിലാണ് ഇവര്‍ പൊലിസിനു ഷബു നല്‍കിയത്. തുടര്‍ന്ന് പൊലിസ് സംഘം ഇവരുടെ കേന്ദ്രത്തില്‍ നടത്തിയ റെയ്ഡിലാണ് ഷബു നിറച്ച നിരവധി ബാഗുകള്‍ കണ്ടെടുത്തത്. ഇവരുമായി ബന്ധപ്പെട്ട മുഴുവന്‍ കണ്ണികളെയും പിടികൂടാനായി സൈബര്‍ സെല്ലിന്റെ സഹായത്തോടെ അന്വേഷണം പുരോഗമിക്കുകയാണ്.