കല്‍പ്പറ്റ: വനം-വന്യജീവി, പ്രകൃതി സംരക്ഷണം, മൃഗപരിപാലനം തുടങ്ങിയ വിഷയങ്ങളില്‍ ബിരുദാനന്തര ബിരുദ പഠനത്തിനും ഗവേഷണത്തിനും പരിശീലനത്തിനും സംയുക്തമായി സര്‍വകലാശാല രൂപീകരിക്കുന്നതില്‍ വനം-വന്യജീവി, മൃഗസംരക്ഷണ വകുപ്പുകളുടെ തലപ്പത്ത് ആലോചന സജീവം.
ഓഗസ്റ്റിലോ സെപ്റ്റംബറിലോ തിരുവനന്തപുരത്ത് അന്താരാഷ്ട്ര സെമിനാര്‍ സംഘടിപ്പിച്ച് യൂനിവേഴ്‌സിറ്റി രൂപീകരണം ചര്‍ച്ച ചെയ്യാനും തുടര്‍ന്നു സര്‍ക്കാരിനു പ്രൊജക്ട് സമര്‍പ്പിക്കാനുമാണ് ഇരുവകുപ്പുകളുടെയും നീക്കം.
മൃഗസംരക്ഷണം, വനം-വന്യജീവി, പരിസ്ഥിതി സംരക്ഷണം തുടങ്ങിയ വിഷയങ്ങളില്‍ ബിരുദാനന്തര ബിരുദ പഠനത്തിനും ഗവേഷണത്തിനും നിലവില്‍ സംസ്ഥാനത്തു വിപുല സൗകര്യങ്ങളില്ല. കേരള കാര്‍ഷിക സര്‍വകലാശാലക്കു കീഴില്‍ തൃശൂര്‍ വെള്ളാനിക്കരയിലുള്ള കോളജ് ഓഫ് ഫോറസ്ട്രിയിലും (എം.എസ് സി ഫോറസ്ട്രി), കേരള വെറ്ററിനറി ആന്‍ഡ് അനിമല്‍ സയന്‍സസ് സര്‍വകലാശാലയുടെ വയനാട് പൂക്കോട് കാംപസിലുള്ള സെന്റര്‍ ഫോര്‍ വൈല്‍ഡ് ലൈഫ് സ്റ്റഡീസിലും (എം.എസ്‌സി വൈല്‍ഡ് ലൈഫ് സ്റ്റഡീസ്) മാത്രമാണ് ബിരുദാനന്തര ബിരുദ പഠനത്തിന് സൗകര്യം.
അതിനാല്‍ത്തന്നെ ഓരോ വര്‍ഷവും സംസ്ഥാനത്തുനിന്നു നിരവധി വിദ്യാര്‍ഥികളാണ് ഉപരിപഠനത്തിനും ഗവേഷണത്തിനും ഇതര സംസ്ഥാനങ്ങളിലെ സര്‍വകലാശാലകളെയും സ്ഥാപനങ്ങളെയും ആശ്രയിക്കുന്നത്. ഇതൊഴിവാക്കാനും കേരളത്തിനു പുറത്തുനിന്നു വിദ്യാര്‍ഥികളുടെ ഒഴുക്കു സാധ്യമാക്കാനും രാജ്യാന്തര നിലവാരത്തില്‍ സര്‍വകലാശാല തുടങ്ങുന്നതു സഹായകമാകുമെന്നാണ് വകുപ്പു മേധാവികളുടെ വിലയിരുത്തല്‍.
കൊല്ലം ജില്ലയില്‍ ആസ്ഥാനവും ഓപ്പണ്‍ ലാബ് സൗകര്യമുള്ള വയനാട്ടില്‍ മുഖ്യ ഉപകേന്ദ്രവും ഉള്‍പ്പെടുന്ന സംവിധാനമാണ് സര്‍വകലാശാല രൂപീകരണത്തിന്റെ ആലോചനയിലെന്നും സൂചനയുണ്ട്.
വന്യജീവികളും മനുഷ്യരുമായി ബന്ധപ്പെട്ട വിഷയങ്ങളില്‍ അന്താരാഷ്ട നിലവാരത്തിലുള്ള ശാസ്ത്ര മേഖലകളെ സംയോജിപ്പിച്ച് ബിരുദാനന്തരബിരുദ പഠനത്തിനും ഗവേഷണത്തിനും സാഹചര്യം ഒരുക്കുന്നതിനു വയനാട്ടില്‍ പശ്ചിമഘട്ട മേഖല ഇന്‍സ്റ്റിറ്റ്യൂട്ട് സ്ഥാപിക്കുന്നതിനുള്ള പ്രൊജക്ട് കേരള വെറ്ററിനറി ആന്‍ഡ് അനിമല്‍ സയന്‍സസ് സര്‍വകലാശാല സര്‍ക്കാരിന് സമര്‍പ്പിച്ചിരുന്നു.
പ്രൊജക്ടിനെക്കുറിച്ചു ചര്‍ച്ച ചെയ്യുന്നതിന് കഴിഞ്ഞ മാര്‍ച്ച് 13ന് തിരുവനന്തപുരത്ത് വനംമന്ത്രിയുടെ അധ്യക്ഷതയില്‍ ചേര്‍ന്ന അനൗപചാരിക യോഗത്തിലാണ് സര്‍ലകലാശാല എന്ന ആശയം ഉദിച്ചത്.