ഇസ്‌ലാമാബാദ്: പാകിസ്താനിലെ ദേര ഇസ്മാഈല്‍ഖാന്‍ നഗരത്തിലുണ്ടായ വെടിവയ്പിലും ബോംബ് സ്‌ഫോടനത്തിലും എട്ടു പേര്‍ കൊല്ലപ്പെട്ടു. 30ലധികം പേര്‍ക്ക് പരുക്കുണ്ട്. കൊല്ലപ്പെട്ടവരില്‍ നാലു പൊലിസുകാരും ഉള്‍പ്പെടുന്നു.
മോട്ടോര്‍ ബൈക്കിലെത്തിയ തോക്കുധാരികള്‍ പൊലിസ് എയിഡ് പോസ്റ്റിനു നേരെ വെടിവയ്ക്കുകയായിരുന്നുവെന്ന് ജില്ലാ പൊലിസ് മേധാവി സലീം റിയാസ് പറഞ്ഞു. അക്രമികള്‍ ഉടന്‍ രക്ഷപ്പെട്ടു.
പിന്നീട് പൊലിസുകാരുടെ മൃതദേഹം ആശുപത്രിയിലേക്കു കൊണ്ടുപോയപ്പോള്‍ ഒരു വനിതാ ചാവേര്‍ പൊട്ടിത്തെറിച്ചു. രണ്ടു പൊലിസുകാരും നാലു സാധാരണക്കാരും ആശുപത്രിയിലുണ്ടായ സ്‌ഫോടനത്തില്‍ കൊല്ലപ്പെട്ടു. തഹ്‌രീകെ താലിബാന്‍ ആക്രമണ ഉത്തരവാദിത്വമേറ്റെടുത്തു. പാക് താലിബാന്റെ കമാന്‍ഡറെ പൊലിസ് കൊലപ്പെടുത്തിയതിനുള്ള പ്രതികാരമാണിതെന്ന് അവര്‍ അറിയിച്ചു.