ഇരിട്ടി: ആറളം ജനവാസ മേഖലയില്‍ വീണ്ടും കാട്ടാന അക്രമണം. ആനമതില്‍ തകര്‍ത്ത് കാട്ടാനക്കൂട്ടം വീണ്ടും ആദിവാസി പുനരധിവാസ മേഖലയില്‍ ഭീതി വിതച്ചെത്തി. ആനയെ കണ്ട് ഓടിരക്ഷപ്പെടുന്നതിനിടെ വീണ് ആദിവാസി വിദ്യാര്‍ഥികള്‍ക്ക് പരുക്കേറ്റു. മതില്‍ തകര്‍ത്ത് ആറളം ഫാമിലെ ഒമ്പതാം ബ്ലോക്കില്‍ ജനവാസ കേന്ദ്രത്തിലെത്തിയ കാട്ടാനയെ കണ്ട് ഭയന്നോടിയ ആദിവാസി കുടുംബാംഗങ്ങളായ സത്യന്‍, രുക്മണി ദമ്പതികളുടെ മക്കളായ അഞ്ചാം ക്ലാസുകാരി സൂര്യ (10) ഒന്നാം ക്ലാസുകാരന്‍ സദാനന്ദന്‍ (6) എന്നിവര്‍ക്കാണ് പരുക്കേറ്റത്. ഈ കുടുംബം ആനയുടെ മുന്നില്‍ നിന്നു തലനാരിഴക്കാണ് രക്ഷപ്പെട്ടത്.
പരുക്കേറ്റ കുട്ടികളെ ഇരിട്ടി താലൂക്ക് ആശുപത്രിയില്‍ പ്രവേശിപ്പിച്ചു. ആറളംഫാം പുനരധിവാസ മേഖലയിലെ ഒന്‍പത്, 10 ബ്ലോക്കുകളിലെ ആനമതിലാണ് കാട്ടാന തകര്‍ത്തത്. ഒന്‍പതാം ബ്ലോക്കില്‍ 15 മീറ്റര്‍ നീളത്തിലും പത്താം ബ്ലോക്കില്‍ 25 മീറ്റര്‍ നീളത്തിലും കാട്ടാന മതില്‍ തകര്‍ത്തു. ഒരിടവേളക്കുശേഷം വീണ്ടും കാട്ടാനക്കൂട്ടം പ്രതിരോധ മതില്‍ തകര്‍ത്ത് ആറളം ഫാം ആദിവാസി പുനരധിവാസ മേഖലയിലെ ജനവാസ മേഖലയിലെത്തിയതോടെ സ്ത്രീകളും കുട്ടികളും വയോധികരുമായ ആദിവാസി ജനവിഭാഗങ്ങള്‍ ഭീതിയിലാണ് കുടിലുകളില്‍ കഴിയുന്നത്.