തിരുവനന്തപുരം: സ്ത്രീ പ്രവേശനം ഏര്‍പ്പെടുത്തിയ ശബരിമലയില്‍ ഡ്യൂട്ടിക്ക് നിയോഗിക്കുന്നതില്‍ വനിതാ പൊലിസിലെ ഒരുവിഭാഗത്തിന് എതിര്‍പ്പ്. ഇതേത്തുടര്‍ന്ന് സുരക്ഷയ്ക്കായി അന്യസംസ്ഥാനങ്ങളില്‍നിന്ന് കൂടുതല്‍ വനിതാ പൊലിസിനെ കൊണ്ടുവരാന്‍ പൊലിസ് തീരുമാനിച്ചു.
ലോക്കല്‍ പൊലിസ് സ്റ്റേഷനുകളില്‍ ജോലി ചെയ്യുന്ന വനിതാ പൊലിസുകാരെയും വനിതാ ബറ്റാലിയനെയും ശബരിമലയില്‍ ഡ്യൂട്ടിക്ക് നിയോഗിക്കാന്‍ പൊലിസ് ആസ്ഥാനത്ത് ചേര്‍ന്ന ഉന്നതതല യോഗം തീരുമാനിച്ചിരുന്നു. തുടര്‍ന്ന് ഓരോ ജില്ലയില്‍ നിന്നുമുള്ള വനിതാ പൊലിസുകാരുടെ പട്ടിക തയാറാക്കാന്‍ സംസ്ഥാന പൊലിസ് മേധാവി നിര്‍ദേശം നല്‍കി. ഇതിനെ തുടര്‍ന്നാണ് ശബരിമല ഡ്യൂട്ടിക്ക് തങ്ങളെ നിയോഗിക്കരുതെന്ന് വിവിധ സ്റ്റേഷനുകളിലെ യുവതികളായ പൊലിസുകാര്‍ അറിയിച്ചത്.
സുരക്ഷ ശക്തമാക്കുന്നതിന്റെ ഭാഗമായാണ് യുവതികളായ പൊലിസ് ഉദ്യോഗസ്ഥരെ പമ്പയിലും സന്നിധാനത്തും നിയോഗിക്കാനുള്ള നടപടിക്ക് പൊലിസ് ആസ്ഥാനത്ത് ശ്രമം തുടങ്ങിയത്. ഇവര്‍ വിസമ്മതിച്ചതോടെയാണ് സംസ്ഥാനത്തെ മൂന്ന് എ.ആര്‍ ക്യാംപുകളിലെ വനിതാ പൊലിസുകാരെയും വനിതാ ബറ്റാലിയനെയും നിയോഗിക്കാനും, മറ്റു സംസ്ഥാനങ്ങളില്‍നിന്ന് വനിതാ പൊലിസുകാരെ കൊണ്ടുവരാനും തീരുമാനമായത്.
മാസപൂജയ്ക്ക് രണ്ടുദിവസം മുന്‍പുതന്നെ വനിതാ പൊലിസുകാരെ എത്തിക്കുകയാണ് ലക്ഷ്യം. തിരുവനന്തപുരം റേഞ്ച് ഐ.ജി മനോജ് എബ്രഹാമിനാണ് സുരക്ഷാചുമതല. 17ന് വൈകിട്ട് അഞ്ചിനാണ് മാസപൂജയ്ക്ക് ശബരിമല നട തുറക്കുക.