കുമ്പള: പെണ്‍കുട്ടിയെ മാസങ്ങളോളം പീഡിപ്പിച്ച സംഭവത്തില്‍ കുട്ടിയുടെ മാതാവും ഒന്നാം പ്രതിയുടെ കാമുകിയും അറസ്റ്റില്‍. പെണ്‍കുട്ടിയുടെ മാതാവായ 34കാരി, കേസില്‍ ഒന്നാം പ്രതിയായ യുവാവിന്റെ കാമുകി മൊഗ്രാല്‍ പുത്തൂരിലെ 28കാരി എന്നിവരെയാണ് കുമ്പള സി.ഐയുടെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്.

കുമ്പള മുളിഗദ്ധ സ്വദേശിയായ യുവാവിനെ നേരത്തെ പൊലിസ് അറസ്റ്റ് ചെയ്തിരുന്നു. ഒരു സന്നദ്ധസംഘടനയുടെ ഭാരവാഹി കൂടിയായ യുവാവ് പതിനാറുകാരിയായ പെണ്‍കുട്ടിക്ക് വസ്ത്രങ്ങളും മറ്റും നല്‍കി സഹായിക്കുകയും ഇതുവഴി പെണ്‍കുട്ടിയോട് അടുപ്പം സ്ഥാപിച്ച ശേഷം  തന്റെ കാമുകിയുടെ മൊഗ്രാലിലെ വാടകവീട്ടില്‍ വച്ചും പിന്നീട് ഷിറിബാഗിലു മഞ്ചത്തടുക്കയിലെ വാടക ക്വാര്‍ട്ടേഴ്‌സില്‍ വച്ചും രണ്ടു മാസത്തോളം പീഡിപ്പിച്ചതായാണ് പരാതി.

പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ചതിന് യുവാവിനെതിരേയും പീഡനത്തിന് ഒത്താശ ചെയ്തിന് മാതാവിനും പ്രതിയുടെ കാമുകിക്കുമെതിരേയും പോക്‌സോ നിയമപ്രകാരമാണ് പൊലിസ് കേസെടുത്തത്. കോടതിയില്‍ ഹാജരാക്കിയ മാതാവിനെയും പ്രതിയുടെ കാമുകിയെയും റിമാന്‍ഡ് ചെയ്തു.