വണ്ടൂര്‍: ആഗ്രോ ഇന്‍ഡസ്ട്രീസ് കോര്‍പ്പറേഷന് നല്‍കിയ 46 സെന്റ് ഭൂമി തിരിച്ചു പിടിക്കാനുള്ള നടപടികളുമായി ബ്ലോക്ക് അധികൃതര്‍ രംഗത്ത്. ഇതിന്റെ ഭാഗമായുള്ള പരിശോധനക്കായ് കലക്ടര്‍ അമിത് മീണ സ്ഥലത്തെത്തി.
1940 ലാണ് കോര്‍പ്പറേഷന് സ്ഥലം നല്‍കിയത്. വണ്ടൂരിലേയും പരിസരങ്ങളിലേയും നെല്‍കൃഷി പ്രോത്സാഹിപ്പിക്കുന്നതിനും ട്രാക്ടര്‍ അടക്കമുള്ള യന്ത്ര സാമഗ്രികള്‍ നന്നാക്കുന്നതിനും വേണ്ടിയാണ് സ്ഥാപനം തുടങ്ങിയത്.
എന്നാല്‍ വര്‍ഷങ്ങള്‍ കഴിഞ്ഞതോടെ ഇതിന്റെ പ്രവര്‍ത്തനം അവതാളത്തിലായതായി ആരോപണം ഉയര്‍ന്നിരുന്നു. ഇതോടെയാണ് സ്ഥലം തിരിച്ചെടുക്കാന്‍ ബ്ലോക്ക് പഞ്ചായത്ത് തീരുമാനിച്ചത്.
ആഗ്രോ ഇന്‍ഡസ്ട്രീസിന്റെ പ്രവര്‍ത്തനം മറ്റൊരു കെട്ടിടത്തിലേക്ക് മാറ്റും. ഇതിന്റെ ഭാഗമായി ഇന്ന് നാലിന് കലക്ടറേറ്റില്‍ ചര്‍ച്ച നടക്കും. സ്ഥലം വിട്ടു കൊടുക്കുന്ന മുറക്ക് ട്രഷറി, ഭിന്ന ശേഷിക്കാര്‍ക്ക് ഫിസിയോ തെറാപ്പി യൂണിറ്റ്, തുല്യതാ തുടര്‍ വിദ്യാഭ്യാസ കേന്ദ്രത്തിന് ആസ്ഥാനം മുതലായവ ഉള്‍പ്പെട്ട മിനി സിവില്‍ സ്റ്റേഷന്‍ നിര്‍മിക്കാനാണ് തീരുമാനം .