കോഴിക്കോട്: ഒരു മാസം പിന്നിടുന്ന കര്‍ഷക പ്രക്ഷോഭത്തിനു പിന്തുണ പ്രഖ്യാപിച്ച് സ്വതന്ത്ര കര്‍ഷക സംഘം (എസ്.ടി.യു) സംസ്ഥാന കമ്മിറ്റിയുടെ നേതൃത്വത്തില്‍ 31ന് സംസ്ഥാനത്തെ പ്രധാന കേന്ദ്രങ്ങളില്‍ ഐക്യദാര്‍ഢ്യ സദസുകള്‍ സംഘടിപ്പിക്കുമെന്ന് എസ്.ടി.യു സംസ്ഥാന പ്രസിഡന്റ് അഹമ്മദ് കുട്ടി ഉണ്ണികുളം, ജനറല്‍ സെക്രട്ടറി അഡ്വ. റഹ്മത്തുല്ല എന്നിവര്‍ പറഞ്ഞു.
'അന്നം തരുന്ന കര്‍ഷകരുടെ പോരാട്ടത്തിന് തൊഴിലാളികളുടെ പിന്തുണ' എന്ന സന്ദേശമുയര്‍ത്തിക്കൊണ്ടാണ് ഐക്യദാര്‍ഢ്യ സദസുകള്‍ സംഘടിപ്പിക്കുക. കര്‍ഷകവിരുദ്ധ നിയമങ്ങള്‍ പിന്‍വലിക്കുക, കര്‍ഷക പ്രക്ഷോഭത്തിന് ഐക്യദാര്‍ഢ്യം എന്ന ബാനറുകളും പ്ലക്കാര്‍ഡുകളും ഉയര്‍ത്തിപ്പിടിച്ചുകൊണ്ടായിരുക്കും സദസുകള്‍. കേന്ദ്ര സര്‍ക്കാര്‍ ഓഫിസുകള്‍, എഫ്.സി.ഐ ഗോഡൗണുകള്‍, റേഷന്‍ വിതരണ കേന്ദ്രങ്ങള്‍, അങ്ങാടികള്‍ തുടങ്ങി പ്രാദേശികമായി സൗകര്യപ്രദവും ശ്രദ്ധിക്കപ്പെടുന്നതുമായ സ്ഥലങ്ങളിലാണ് സദസുകള്‍ സംഘടിപ്പിക്കുക. കൊവിഡ് പ്രോട്ടോക്കോള്‍ പാലിച്ചുകൊണ്ടായിരിക്കും പരിപാടിയെന്നും നേതാക്കള്‍ അറിയിച്ചു.