തൃശൂര്‍: ബ്രിട്ടീഷ് നാവികസേന പിടിച്ചെടുത്ത ഇറാനിയന്‍ കപ്പലിലെ ജീവനക്കാരനായ ഗുരുവായൂര്‍ സ്വദേശി റെജിന്റെ മോചനത്തിനായി സര്‍ക്കാര്‍ കാര്യമായി ഇടപെട്ടില്ലെന്ന ആക്ഷേപവുമായി പിതാവ് രാജന്‍. മലപ്പുറം വണ്ടൂര്‍ സ്വദേശി കെ.കെ അജ്മല്‍, കാസര്‍കോട് സ്വദേശി പ്രദീഷ് എന്നിവരാണ് റെജിനൊപ്പം കപ്പലിലുള്ള മലയാളികള്‍. റെജിന്‍ കഴിഞ്ഞ ദിവസം ഫോണില്‍ ബന്ധപ്പെട്ടിരുന്നതായി ബന്ധുക്കള്‍ പറഞ്ഞു. ആറുമാസം മുന്‍പാണ് റെജിന്‍ നാട്ടില്‍ വന്നു തിരിച്ചുപോയത്. മാധ്യമങ്ങളിലൂടെയാണ് വാര്‍ത്തയറിഞ്ഞത്. എന്താണ് അവസ്ഥയെന്നറിയില്ല. സംഭവമറിഞ്ഞ് നഗരസഭ കൗണ്‍സിലര്‍ മാത്രമാണ് ഇതുവരെ ബന്ധപ്പെട്ടിട്ടുള്ളതെന്നും രാജന്‍ പറയുന്നു.