ചെറുവത്തൂര്‍: ചീമേനി ചാനടുക്കത്ത് കഴിഞ്ഞ ദിവസം എസ്.കെ.എസ്.എസ്.എഫ് പതാക ദിനത്തില്‍ പ്രവര്‍ത്തകര്‍ നാട്ടിയ കൊടി ഡി.വൈ.എഫ്.ഐ പ്രവര്‍ത്തകര്‍ അഴിപ്പിക്കുകയും നേതാക്കളെ കയ്യേറ്റം ചെയ്യുകയും ചെയ്ത സംഭവത്തില്‍ പാര്‍ട്ടി നേതൃത്വം ഖേദം പ്രകടിപ്പിച്ചു.

ചീമേനി പൊലിസ് സ്റ്റേഷനില്‍ വച്ച് സി.ഐ യുടെ നേതൃത്വത്തില്‍ നടന്ന ചര്‍ച്ചയില്‍ പാര്‍ട്ടി നേതൃത്വം ഖേദം പ്രകടിപ്പിക്കുകയും കൊടി പുനസ്ഥാപിക്കുന്നതില്‍ യാതൊരു എതിര്‍പ്പും ഇല്ലെന്ന് രേഖാ മൂലം എഴുതി നല്‍കുകയും ചെയ്തതിന്റെ അടിസ്ഥാനത്തിലാണ് പ്രശ്‌നത്തിന് പരിഹാരമായത്. തുടര്‍ന്ന് ഉച്ചയോടെ പതാക സംസ്ഥാന വര്‍ക്കിങ് സെക്രട്ടറി താജുദ്ധീന്‍ ദാരിമിയുടെ നേതൃത്വത്തില്‍ പുനസ്ഥാപിച്ചു.

എസ്.കെ.എസ്.എസ്.എഫ് സംസ്ഥാന വ്യാപകമായി നടത്തിയ പതാകദിനാഘോഷ പരിപാടിയുടെ ഭാഗമായി ചാനടുക്കം ശാഖയുടെ നേതൃത്വത്തില്‍ നടത്തിയ പരിപാടിയാണ് ഡി.വൈ.എഫ്.ഐ ബ്രാഞ്ച് സെക്രട്ടറി രാധാകൃഷ്ണന്‍, എസ്.എസ്.എഫ് നേതാവ് റഫീഖ് എന്നിവരുടെ നേതൃത്വത്തിലെത്തിയ ഒരു സംഘം പാര്‍ട്ടി പ്രവര്‍ത്തകര്‍ അലങ്കോലപ്പെടുത്തി നേതാക്കളെയും പ്രവര്‍ത്തകരെയും കയ്യേറ്റം ചെയ്യുകയും ചെയ്തത്.

തുടര്‍ന്ന് പരിപാടിയുടെ ഭാഗമായി ഉയര്‍ത്തിയ പതാക ബലം പ്രയോഗിച്ച് അഴിപ്പിക്കുകയും പ്രമേയപ്രഭാഷണം നടത്തുകയായിരുന്ന ചീമേനി ടൗണ്‍ ഖതീബും എസ്.എം.എഫ് സംസ്ഥാന സമിതിയംഗവുമായ ജാബിര്‍ ഹുദവിയെയും എസ്.കെ.എസ്.എസ്.എഫ് പ്രവര്‍ത്തകരെയും കൈയേറ്റം ചെയ്തത്. സാമൂഹിക മാധ്യമങ്ങള്‍ ചര്‍ച്ചയാവുകയും സംഭവം വലിയ
പ്രതിഷേധങ്ങള്‍ക്ക് ഇടയാക്കിയിരുന്നു.

ചര്‍ച്ചയില്‍ എസ് കെ എസ് എസ് എഫ് , ജില്ലാ സെക്രട്ടറി യൂനുസ് ഫൈസി, , ജാബിര്‍ ഹുദവി ചാനടുക്കം, ലുക്മാന്‍ അസ്അദി, എന്നിവരും, ഡി വൈ എഫ് ഐ യൂണിറ്റ് സെക്രട്ടറി, രാധാകൃഷ്ണന്‍, സി.വി.പ്രകാശന്‍, സുഭാഷ് അറുകര 'എസ് എസ് എഫ് പ്രവര്‍ത്തകന്‍ റഫീഖ് , പങ്കെടുത്തു.