എരുമപ്പെട്ടി:എരുമപ്പെട്ടി പഞ്ചായത്തിലെ മുട്ടിക്കലില്‍ ജനവാസ കേന്ദ്രത്തില്‍ നടക്കുന്ന മൊബൈല്‍ ടവര്‍ നിര്‍മാണത്തിനെതിരേ ജനകീയ സമിതിയുടെ നേതൃത്വത്തില്‍ പ്രദേശവാസികള്‍ പ്രക്ഷോഭത്തിനൊരുങ്ങുന്നു.
എരുമപ്പെട്ടി പഞ്ചായത്തിലെ എട്ടാം വാര്‍ഡ് മുട്ടിക്കല്‍ മോസ്‌ക് റോഡ് പരിസരത്തുള്ള സ്വകാര്യ വ്യക്തിയുടെ പറമ്പിലാണ് റിലയന്‍സ് ജിയോ മൊബൈല്‍ കമ്പനിയുടെ ടവര്‍ നിര്‍മിക്കുന്നത്. ഇതിന് സമീപം അമ്പതോളം കുടംബങ്ങള്‍ വീട് വെച്ച് താമസിക്കുന്നുണ്ട്. കുന്നിടിച്ച് മണ്ണെടുത്തിട്ടുള്ള സ്ഥലത്ത് ഉയര്‍ന്ന പ്രദേശത്താണ് ടവര്‍ സ്ഥാപിക്കുന്നത്.പരിസ്ഥിതി ലോല പ്രദേശമായ ഇവിടെ വീടു നിര്‍മാണത്തിനാണെന്ന് കാണിച്ചാണ് മണ്ണെടുപ്പ് നടത്താനും ടവര്‍ നിര്‍മിക്കാനും അനുമതി വാങ്ങിയിട്ടുള്ളത്. കാന്‍സര്‍ ബാധിച്ചവര്‍ ഉള്‍പ്പടെ നിരവധി കിടപ്പുരോഗികളുള്ള പ്രദേശത്ത് നിലവില്‍ നാല് ടവറുകള്‍ പ്രവര്‍ത്തിക്കുന്നുണ്ട്. പ്രദേശവാസികളുടെ അനുമതി വാങ്ങാതെയാണ് പഞ്ചായത്ത് ടവര്‍ നിര്‍മാണത്തിന് അനുമതി നല്‍കിയിട്ടുള്ളത്.ജനങ്ങളുടെ പരാതി രേഖപ്പെടുത്തുന്നതിന് ഗ്രാമസഭ വിളിച്ച് ചേര്‍ക്കാന്‍ നാട്ടുകാര്‍ അപേക്ഷ നല്‍കിയെങ്കിലും പഞ്ചായത്ത് ഇതിന് തയാറാകുന്നില്ല. നിര്‍മാണ അനുമതി റദ്ദ് ചെയ്യാന്‍ തീരുമാനമെടുത്തിട്ടുണ്ടെന്ന് അറിയിച്ച് പഞ്ചായത്ത് ഭരണ സമിതിയും വാര്‍ഡ് മെമ്പറും ജനങ്ങളെ കബളിപ്പിക്കുകയാണെന്ന് സമര സമിതി ആരോപിച്ചു ടവര്‍ നിര്‍മാണ അനുമതി റദ്ദ് ചെയ്യുന്നത് വരെ കുടില്‍ കെട്ടി കുത്തിയിരിപ്പ് സമരം നടത്തുമെന്ന് ജനകീയ സമിതി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. പ്രസിഡന്റ് മഞ്‌ജേഷ് വടക്കൂട്ട്, സെക്രട്ടറി രാജീവ് കാരമുക്കില്‍, ഹബീബ ജലീല്‍, രജനി ശശിധരന്‍, കാസിം മുട്ടിക്കല്‍ പങ്കെടുത്തു.