കൊച്ചി: നയതന്ത്ര ചാനല്‍ വഴി സ്വര്‍ണം കടത്തിയ കേസിലെ പ്രതി മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കര്‍ സമര്‍പ്പിച്ച ജാമ്യാപേക്ഷയില്‍ കോടതി ഇന്നു വിധി പറയും. ഇരുഭാഗത്തിന്റെയും വാദം കേട്ട ശേഷമാണ് എറണാകുളം എ.സി.ജെ.എം കോടതി ജാമ്യ ഹരജി വിധി പറയാനായി മാറ്റിയത്.
സ്വപ്ന സുരേഷിനൊപ്പം ശിവശങ്കര്‍ ഏഴു തവണ വിദേശ യാത്ര നടത്തിയെന്നു വാദത്തിനിടെ കസ്റ്റംസ് ആരോപിച്ചു. ഫൈവ് സ്റ്റാര്‍ ഹോട്ടലില്‍ ഒരുമിച്ച് താമസിച്ചതായും ഇതിന്റെ ചെലവ് വഹിച്ചത് ശിവശങ്കറായിരുന്നെന്നും കസ്റ്റംസ് ആരോപിച്ചു. കള്ളക്കടത്ത് സംഭവം യു.എ.ഇയുമായുള്ള സൗഹൃദ ബന്ധത്തിനു കോട്ടം തട്ടാന്‍ കാരണമായിട്ടുണ്ട്. തിരുവനന്തപുരത്തെ യു.എ.ഇ കോണ്‍സുലേറ്റിന്റെ പ്രവര്‍ത്തനത്തെയും ഇതു സാരമായി ബാധിച്ചിട്ടുണ്ട്.
കാന്‍സര്‍ സംശയിക്കുന്നതായി ചൂണ്ടിക്കാട്ടി ശിവശങ്കര്‍ കോടതിയില്‍ നല്‍കിയ മെഡിക്കല്‍ റിപ്പോര്‍ട്ട് ആറു വര്‍ഷം മുന്‍പുള്ളതായിരുന്നെന്നും കസ്റ്റംസ് ആരോപിച്ചു. മറ്റു പ്രതികള്‍ നല്‍കിയ മൊഴികള്‍ അല്ലാതെ തനിക്കെതിരേ ഒരു തെളിവുമില്ലെന്നും ശിവശങ്കര്‍ കൂട്ടിചേര്‍ത്തിരുന്നു.