രാജപുരം: നിര്‍ദ്ദിഷ്ട കാഞ്ഞങ്ങാട്-കാണിയൂര്‍ റെയില്‍പാത നിര്‍മാണത്തിനുള്ള സംസ്ഥാന സര്‍ക്കാര്‍ വിഹിതം നല്‍കാമെന്നു സമ്മതിച്ചത് കേന്ദ്ര റെയില്‍വേ മന്ത്രാലയത്തെ രേഖാമൂലം അറിയിക്കണമെന്നാവശ്യപ്പെട്ട് കര്‍മ സമിതി ഭാരവാഹികള്‍ മന്ത്രി ഇ. ചന്ദ്രശേഖരന് നിവേദനം നല്‍കി.
കാഞ്ഞങ്ങാട്-കാണിയൂര്‍ പാത കേരളത്തിലൂടെ കടന്ന് പോകുന്ന 45 കിലോമീറ്ററിനുള്ള പദ്ധതി വിഹിതത്തിന്റെ പ്രാരംഭമായി 20 കോടി രൂപ 2015-16 വര്‍ഷത്തെ സംസ്ഥാന ബജറ്റില്‍ ഉള്‍പ്പെടുത്തിയിരുന്നു. കാഞ്ഞങ്ങാട്-കാണിയൂര്‍ പാതയുടെ സര്‍വേ വിശദാംശങ്ങള്‍ റെയില്‍വേ ബോര്‍ഡിന്റെ പരിഗണനയിലാണ്.
എന്നാല്‍ സംസ്ഥാന സര്‍ക്കാര്‍ പദ്ധതി വിഹിതം നല്‍കാമെന്ന് രേഖാമൂലം അറിയിക്കാത്തതിനാല്‍ തുടര്‍ നടപടികള്‍ വൈകുന്നതായും നിവേദനത്തില്‍ ചൂണ്ടിക്കാട്ടി. ഉത്തര കേരളത്തിന്റെയും ദക്ഷിണ കന്നടയുടെയും സ്വപ്ന പദ്ധതിയായ കാഞ്ഞങ്ങാട്-കാണിയൂര്‍ പാത യാഥാര്‍ത്ഥ്യമാക്കാനാവശ്യമായ ഇടപെടല്‍ നടത്തണമെന്നും നിവേദനത്തില്‍ ആവശ്യപ്പെട്ടു.
കര്‍മ സമിതി ഭാരവാഹികളായ സി. യൂസഫ് ഹാജി, സി.എ പീറ്റര്‍, ടി. മുഹമ്മദ് അസ്‌ലം, സൂര്യഭട്ട്, ജോസ് കൊച്ചുകുന്നേല്‍, എം.വി ഭാസ്‌കരന്‍, എ. ദാമോദരന്‍ എന്നിവരാണ് മന്ത്രിയെ നേരില്‍ കണ്ട് നിവേദനം സമര്‍പ്പിച്ചത്.