കാക്കനാട് : മാസങ്ങള്‍ക്ക് മുമ്പു കുടിവെള്ള പൈപ്പിടുന്നതിനുവേണ്ടി വാട്ടര്‍ അതോറിട്ടി വെട്ടിപൊളിച്ച് കുളമാക്കിയ തൃക്കാക്കര ടീവി സെന്റര്‍  തുതിയൂര്‍ റോഡിലെ ഈച്ചമുക്ക് ജങ്ഷന്‍ തറയോട് വിരിച്ചു  മനോഹരമാക്കി.
 റോഡിന്റെ ശോചനീയ അവസ്ഥയും ഇരുചക്ര വാഹനങ്ങളുടെ അപകടങ്ങളേക്കുറിച്ചും കഴിഞ്ഞദിവസം സുപ്രഭാതം റിപ്പോര്‍ട്ട് ചെയ്തിരുന്നു. തുടര്‍ന്ന് വാര്‍ഡ് കൗണ്‍സിലര്‍ എം.എം നാസറിന്റെ ഇടപെടലാണ് നിര്‍മാണം വേഗത്തിലാകാന്‍ കാരണം.
റോഡു വെട്ടിപൊളിച്ചതില്‍ പ്രതിഷേധിച്ച് മാസങ്ങള്‍ക്ക് മുമ്പ് നാട്ടുകാരും കുടുംബശ്രീ പ്രവര്‍ത്തകരും ഈച്ചമുക്ക് ജങ്ഷനില്‍ ജനകീയ സമരം നടത്തിയിരുന്നു. സ്ഥലത്തെത്തിയ പൊലിസും സമരക്കാരുമായി വാക്കേറ്റമുണ്ടാകുകയും പതിനാല് പേര്‍ക്കെതിരേ കേസെടുക്കുകയും ചെയ്തിരുന്നു.
നാളുകള്‍ ഏറെയായി കഷ്ടപെടുന്ന യാത്രക്കാരുടെ ബുദ്ധിമുട്ട് പരിഹരിച്ച് ടൈല്‍ വിരിച്ച് മനോഹരമാക്കി വന്‍ ആഘോഷമാക്കിയിരികുകയാണ് നാട്ടുകാര്‍. പ്രദേശത്ത് കുടുംബശ്രീ പ്രവര്‍ത്തകര്‍  മധുര വിതരണം നടത്തി.