ജൊഹാനസ്ബര്‍ഗ്: സിംബാബ്‌വെക്കെതിരായ ഏകദിന പരമ്പര ആതിഥേയരായ ദക്ഷിണാഫ്രിക്ക 3-0ന് തൂത്തുവാരി. പരമ്പരയിലെ അവസാന മത്സരത്തില്‍ നാല് വിക്കറ്റിന്റെ തകര്‍പ്പന്‍ ജയമാണ് ദക്ഷിണാഫ്രിക്ക സ്വന്തമാക്കിയത്.
ആദ്യം ബാറ്റ് ചെയ്ത സിംബാബ്‌വെയെ 49.3 ഓവറില്‍ 228 റണ്‍സില്‍ പുറത്താക്കിയ ദക്ഷിണാഫ്രിക്ക 45.5 ഓവറില്‍ ആറ് വിക്കറ്റ് നഷ്ടപ്പെടുത്തി ലക്ഷ്യത്തിലെത്തി. 69 റണ്‍സെടുത്ത സീന്‍ വില്ല്യംസാണ് സിംബാബ്‌വെയുടെ ടോപ് സ്‌കോറര്‍. ദക്ഷിണാഫ്രിക്കയ്ക്കു വേണ്ടി ഡെയ്ല്‍ സ്റ്റെയ്ന്‍, കാഗിസോ റബാഡ എന്നിവര്‍ മൂന്നും ഇംറാന്‍ താഹിര്‍, പെഹ്ലുക്‌വായോ എന്നിവര്‍ രണ്ടും വിക്കറ്റ് വീഴ്ത്തി.
മറുപടി ബാറ്റിങ്ങിനിറങ്ങിയ ദക്ഷിണാഫ്രിക്ക റീസ ഹെന്‍ഡ്രിക്‌സിന്റേയും (66) ഹെയ്ന്റിച്ച് ക്ലാസെന്റെയും (59) അര്‍ധസെഞ്ചുറി മികവിലാണ് ലക്ഷ്യത്തിലെത്തിയത്. എയ്ഡന്‍ മാര്‍ക്രം (42), ഡുപ്ലെസിസ് (26), ഖായ സോണ്ടോ (25) എന്നിവരും ദക്ഷിണാഫ്രിക്കയ്ക്കു വേണ്ടി തിളങ്ങി. ദക്ഷിണാഫ്രിക്കയുടെ ക്ലാസെനെ മാന്‍ ഓഫ് ദി മാച്ചായും ഇംറാന്‍ താഹിറിനെ മാന്‍ ഓഫ് ദി സീരീസായും തിരഞ്ഞെടുത്തു.