ചെറുവത്തൂര്‍: ഓരോ പാഠം കഴിയുമ്പോഴും കുട്ടികള്‍ എന്തൊക്കെ പഠിച്ചിരിക്കണമെന്നത് ഇനി രക്ഷിതാക്കള്‍ക്ക് എളുപ്പമറിയാം. ഓരോ ക്ലാസുകളിലും കുട്ടികള്‍ നേടേണ്ട പഠന നേട്ടങ്ങള്‍ രേഖപ്പെടുത്തിയ കലണ്ടര്‍ ഇക്കുറിയുണ്ടാകും. ഒന്നു മുതല്‍ ഏഴു വരെ ക്ലാസുകളിലെ പഠനനേട്ടങ്ങളുമായി ബന്ധപ്പെട്ട കലണ്ടര്‍ പ്രവേശനോത്സവ ചടങ്ങില്‍ ഓരോ വിദ്യാലയത്തിലും പ്രകാശനം ചെയ്യും. സര്‍വശിക്ഷാ അഭിയാനാണ് കലണ്ടര്‍ തയാറാക്കിയിരിക്കുന്നത്. ഓരോ ക്ലാസിലും വിഷയാടിസ്ഥാനത്തില്‍ കലണ്ടറുകളുണ്ട്.
പ്രതിമാസം നടക്കുന്ന പി.ടി.എ യോഗങ്ങളിലാണു പഠന കാര്യങ്ങള്‍ അധ്യാപകര്‍ രക്ഷിതാക്കളുമായി പങ്കുവച്ചിരുന്നത്. ഇനി എപ്പോള്‍ വിദ്യാലയം സന്ദര്‍ശിക്കുമ്പോഴും ക്ലാസ് മുറിയുടെ ചുമരില്‍ പതിച്ച കലണ്ടറില്‍ നിന്നു കുട്ടികള്‍ പഠിക്കേണ്ട കാര്യങ്ങള്‍ രക്ഷിതാക്കള്‍ക്കു മനസിലാക്കാം. പാഠപുസ്തകങ്ങളില്‍ കുട്ടികളുടെ പഠനനേട്ടങ്ങള്‍ രേഖപ്പെടുത്തിയിട്ടുണ്ടെങ്കിലും സ്‌കൂള്‍ ചുമരുകളിലേക്ക് ഇതെത്തുന്നതു രക്ഷിതാക്കള്‍ക്ക് ഏറെ സഹായകമാകും. ഒപ്പം കുട്ടികളുടെ പഠന നിലവാരം അവലോകനം ചെയ്യുന്നതിനും ഇതു സഹായിക്കും. ഇതാദ്യമായാണ് ഇത്തരം കലണ്ടര്‍ ക്ലാസ് മുറികളിലെത്തുന്നത്.