നരിക്കുനി: പൊതുവിദ്യാലയങ്ങള്‍ കാര്യക്ഷമമല്ലെന്ന പരിഭവങ്ങള്‍ക്കിടയില്‍ ശക്തമായ തിരിച്ചുവരവിലൂടെ വിസ്മയം തീര്‍ക്കുകയാണ് നരിക്കുനി പഞ്ചായത്തിലെ നെടിയനാട് ജി.എം.എല്‍.പി സ്‌കൂള്‍. നാട്ടുകാര്‍ സ്വരൂപിക്കുന്ന ആറു ലക്ഷം രൂപ ചെലവഴിച്ച് സ്‌കൂളിലെ ആറു ക്ലാസ് റൂമുകള്‍ സ്മാര്‍ട്ടാക്കി മാറ്റിയാണ് ഈ വിദ്യാലയം വേറിട്ട മാതൃകയൊരുക്കുന്നത്.
 1927-ല്‍ സ്ഥാപിതമായ സ്‌കൂളില്‍ ഈവര്‍ഷം 43 വിദ്യാര്‍ഥികള്‍ ഒന്നാം ക്ലാസില്‍ പ്രവേശനം നേടിയതോടെ എയ്ഡഡ് വിഭാഗം പ്രീ-പ്രൈമറിയിലടക്കം 150ഓളം കുട്ടികള്‍ പഠനം നടത്തുന്നുണ്ട്.
കഴിഞ്ഞ വര്‍ഷം പ്രീ-പ്രൈമറി തലത്തില്‍ 71 കുട്ടികളാണുണ്ടായിരുന്നത്. ഒന്നാം ക്ലാസില്‍ കഴിഞ്ഞ വര്‍ഷം 12 കുട്ടികള്‍ മാത്രമേ പ്രവേശനം നേടിയിരുന്നുള്ളു.  വാര്‍ഡ് അംഗത്തിന്റെയും സ്‌കൂള്‍ ഹെഡ് മിസ്ട്രസിന്റെയും നേതൃത്വത്തില്‍ പ്രവര്‍ത്തിക്കുന്ന ജനകീയ സമിതിയുടെ നേതൃത്വത്തില്‍ രണ്ടു പ്രീ-പ്രൈമറി ക്ലാസുകളും നാലു പ്രൈമറി ക്ലാസുകളും സ്മാര്‍ട്ട് ആക്കാനുള്ള പ്രവര്‍ത്തനങ്ങളാണ് നടക്കുന്നത്. തുക മുഴുവനായും നാട്ടുകാരില്‍ നിന്ന് സമാഹരിക്കാനാണ് പദ്ധതി. അഞ്ച് അധ്യാപകരും ഒരു പി.ടി.സി.എമ്മും ജോലി ചെയ്യുന്ന ഈ സ്ഥാപനത്തിന് സ്വന്തമായി 69 സെന്റ് സ്ഥലവും ഉയര്‍ന്ന ബൗദ്ധിക സാഹചര്യങ്ങളുമുണ്ട്.
സ്‌കൂളിനെ അന്താരാഷ്ട്ര നിലവാരത്തിലേക്കുയര്‍ത്തുകയെന്ന സ്വപ്നം യാഥാര്‍ഥ്യമാക്കുകയാണ് ജനകീയ സമിതിയുടെ അടുത്ത ലക്ഷ്യം. ഈ മാസം തന്നെ സ്മാര്‍ട്ട് ക്ലാസ്‌റൂമുകളുടെ ഉദ്ഘാടനം നടത്താനുള്ള ഒരുക്കത്തിലാണ് നാട്ടുകാര്‍. പുതിയ അധ്യയന വര്‍ഷത്തെ ബ്ലോക്ക് പഞ്ചായത്ത്തല പ്രവേശനോത്സവത്തിന് ആതിഥേയത്വം വഹിക്കുന്നതും ഈ വിദ്യാലയമാണ്.