അരീക്കോട്: ഉരുള്‍പൊട്ടലും കനത്ത മഴയുംമൂലം നാശനഷ്ടം നേരിട്ട ഊര്‍ങ്ങാട്ടിരി പഞ്ചായത്തിലെ ആദിവാസികള്‍ക്ക് സാമ്പത്തിക സഹായം ചൊരിഞ്ഞ് പ്രവാസി കൂട്ടായ്മ. വെറ്റിലപ്പാറ പ്രവാസി കൂട്ടായ്മയുടെ നേതൃത്വത്തില്‍ 60,000 ഓളം രൂപ ഓടക്കയം പ്രദേശത്തെ ഭവന രഹിതരരായ പതിനാല് കുടുംബങ്ങള്‍ക്ക് നല്‍കി.
കഴിഞ്ഞ പ്രളയസമയത്ത് കോടികളുടെ കൃഷിനാശമാണ് ഇവിടത്തുകാര്‍ക്ക് നേരിടേണ്ടി വന്നത്. ഉരുള്‍പൊട്ടലില്‍ തകര്‍ന്ന കുടിവെള്ള പൈപ്പുകളും സംഭരണ ടാങ്കുകളും വെറ്റിലപ്പാറ പ്രവാസി കൂട്ടായ്മയുടെ നേതൃത്വത്തില്‍ ആദ്യഘട്ടത്തില്‍ പുനസ്ഥാപിച്ചിരുന്നു.
സഹായ പദ്ധതിയുടെ രണ്ടാംഘട്ടമെന്ന നിലയിലാണ് ഭവനരഹിതര്‍ക്കുള്ള സഹായ വിതരണം നടത്തിയത്. കെ.പി സുനീര്‍, പി.റഷീദ്, ബിബിന്‍ ജോയ്, പി.കെ സാബു, കെ.അബിന്‍ഷ, കെ.ജിനേഷ് എന്നിവര്‍ നേതൃത്വം നല്‍കി.