ചാവക്കാട് (തൃശൂര്‍) : പുന്നയില്‍ കോണ്‍ഗ്രസ് ബൂത്ത് പ്രസിഡന്റ് പുതുവീട്ടില്‍ നൗഷാദിനെ വെട്ടിക്കൊലപ്പെടുത്തിയ സംഘത്തിലെ ഒരാള്‍ പിടിയില്‍. പുന്നയൂര്‍ പഞ്ചായത്തിലെ അകലാട് നാലാംകല്ല് തൈപ്പറമ്പില്‍ മുബീനെയാണ് (26)അറസ്റ്റ് ചെയ്തത്.
പ്രദേശത്തെ സജീവ എസ്.ഡി.പി.ഐ പ്രവര്‍ത്തകനായ ഇയാളുട പേരില്‍ നിരവധി ക്രിമിനല്‍ കേസുകളുണ്ടെന്ന് പൊലിസ് പറഞ്ഞു. ചൊവ്വാഴ്ച വൈകിട്ട് പുന്ന സെന്ററില്‍ ഏഴ് ബൈക്കുകളിലായെത്തി നൗഷാദിനെ വെട്ടിയ സംഘത്തില്‍ അംഗമാണിയാള്‍. ചാവക്കാട് സ്റ്റേഷന്‍ പരിധിയില്‍ നിന്നാണ് മുബീനെ പിടികൂടിയത്. ഇയാളെ അന്വേഷണ സംഘം തൃശൂരിലേക്ക് കൊണ്ടുപോയി. അതേസമയം, ഇക്കാര്യം സ്ഥിരീകരിക്കാന്‍ പൊലിസ് തയാറായിട്ടില്ല.