കാസര്‍കോട്: ജില്ലാ ജഡ്ജി അവധിയില്‍ പോയതോടെ റിയാസ് മുസ്‌ലിയര്‍ വധക്കേസിന്റെ വിചാരണ താല്‍ക്കാലികമായി മാറ്റിവച്ചു. കാസര്‍കോട് പഴയ ചൂരി ജുമാ മസ്ജിദിലെ മുഹദ്ദിനും മദ്‌റസയിലെ അധ്യാപകനുമായിരുന്ന കുടക് സ്വദേശി മുഹമ്മദ് റിയാസ് മുസ്‌ലിയാരെ 2017 മാര്‍ച്ച് 20നു കഴുത്തറുത്തു കൊലപ്പെടുത്തിയ കേസിന്റെ വിചാരണ ജില്ലാ പ്രിന്‍സിപ്പല്‍ സെഷന്‍സ് കോടതിയില്‍ തിങ്കളാഴ്ചയാണ് ആരംഭിച്ചത്. മൂന്നാം സാക്ഷി ഉള്‍പ്പെടെ അഞ്ചു സാക്ഷികളെയാണ് വിസ്തരിച്ചത്. ഇതിനിടെയാണ് ജഡ്ജി മനോഹര്‍കിണിയുടെ സഹോദരന്‍ മരിച്ചതിനെ തുടര്‍ന്ന് ജഡ്ജി സഹോദരന്റെ മരണാനന്തര ചടങ്ങില്‍ പങ്കെടുക്കാന്‍ അവധിയില്‍ പോയത്. ഇതേ തുടര്‍ന്ന് ഈ മാസം 22വരെ വിചാരണ നിര്‍ത്തിവച്ചിരിക്കുകയാണ്. ആര്‍.എസ്.എസ് പ്രവര്‍ത്തകരായ മൂന്നുപേരാണു കേസിലെ പ്രതികള്‍.