നിലമ്പൂര്‍: 125 ലിറ്റര്‍ മാഹി നിര്‍മിത വിദേശമദ്യവുമായി ഒരാള്‍ എക്‌സൈസിന്റെ പിടിയില്‍. ചുങ്കത്തറ കാട്ടിച്ചിറ സ്വദേശി ചെറൂത്ത് വീട്ടില്‍ കൃഷ്ണനെ(53) ബൈക്ക് സഹിതം പിടികൂടിയത്. നിലമ്പൂര്‍ എക്‌സൈസ് റെയ്ഞ്ച് പാര്‍ട്ടി നടത്തിയ പരിശോധനയിലാണ് ഇയാള്‍ പിടിയിലായത്. 200 ഓളം കുപ്പികളിലായി ഇയാളുടെ ഉടമസ്ഥതയിലുള്ള പറമ്പില്‍ സൂക്ഷിച്ചിരിക്കുകയായിരുന്നു.
മാഹിയില്‍ നിന്നും വലിയ അളവില്‍ മദ്യം കടത്തിക്കൊണ്ടുവന്ന് സൂക്ഷിച്ചുവച്ച് ആവശ്യക്കാര്‍ക്ക് സ്വന്തം ബൈക്കില്‍ എത്തിച്ചുകൊടുക്കുകയാണ് പതിവ്. കഴിഞ്ഞ വര്‍ഷം മെയ് മാസത്തില്‍ ഇയാളെ കാറടക്കം 45 ലിറ്റര്‍ മാഹി മദ്യം പിടികൂടിയിരുന്നു. പ്രതിയെ നിലമ്പൂര്‍ കോടതിയില്‍ ഹാജരാക്കി റിമാന്‍ഡ് ചെയ്തു. എക്‌സൈസ് പ്രിവന്റീവ് ഓഫിസര്‍ ബിജു പി എബ്രഹാമിന്റെ നേതൃത്വത്തില്‍ സിവില്‍ എക്‌സൈസ് ഓഫിസര്‍മാരായ സി സുഭാഷ്, ഇ ടി ജയാനന്ദന്‍, ബാബു ജെയിംസ്, കെ എസ് അരുണ്‍കുമാര്‍, ബി ഹരിദാസന്‍, ഡ്രൈവര്‍ പ്രദീപ് കുമാര്‍, വനിതാ സിവില്‍ എക്‌സൈസ് ഓഫിസര്‍മാരായ ഇ. ഷീന, എന്‍.കെ നസീറ എന്നിവരും പരിശോധനയില്‍ പങ്കെടുത്തു.