ഷിമോഗ: സര്‍ക്കാര്‍ ആശുപത്രിയുടെ ദുരവസ്ഥ ഒരിക്കലും പരിഹരിക്കപ്പെടാറില്ല. എന്നാല്‍ വീല്‍ചെയറുണ്ടായിട്ടും അത് നല്‍കാന്‍ കൂട്ടാക്കാത്ത ഒരു സര്‍ക്കാര്‍ ആശുപത്രിയില്‍ ഇന്നലെയുണ്ടായ സംഭവം വൈറലായത് കര്‍ണാടക സര്‍ക്കാരിനും ആരോഗ്യ വകുപ്പിനും നാണക്കേടായി മാറിയിരിക്കുകയാണ്.
സ്‌ട്രെച്ചറോ വീല്‍ചെയറോ നല്‍കാന്‍ തയാറാകാത്തതിനെതുടര്‍ന്ന് അസുഖ ബാധിതനായ ഭര്‍ത്താവിനെ കാലില്‍ പിടിച്ച് എക്‌സ്‌റെ മുറിയിലേക്ക് വലിച്ചുകൊണ്ടുപോയ സംഭവമാണ് കര്‍ണാടകയില്‍ വിവാദത്തിനിടയാക്കിയത്.
ഷിമോഗ ജില്ലയിലെ ഒരു സര്‍ക്കാര്‍ ആശുപത്രിയില്‍ നടന്ന ഈ ദുരവസ്ഥ ആരോ പകര്‍ത്തി വാട്‌സ് ആപ്പില്‍ ഇട്ടതോടെയാണ് സംഭവം പുറംലോകമറിഞ്ഞത്. അസുഖ ബാധിതനായ ഭര്‍ത്താവിനെയും കൊണ്ട് സര്‍ക്കാര്‍ ആശുപത്രിയിലെത്തിയപ്പോള്‍ ഡോക്ടര്‍ എക്‌സ്‌റെ എടുക്കാന്‍ നിര്‍ദേശിച്ചു. ഉടനെ ഭര്‍ത്താവിനെ കൊണ്ടുപോകാന്‍ സ്ട്രച്ചറോ വീല്‍ചെയറോ കിട്ടുമോയെന്ന് അന്വേഷിച്ചെങ്കിലും ആശുപത്രി അധികൃതര്‍ നല്‍കാന്‍ തയാറായില്ല. തുടര്‍ന്നാണ് ഭര്‍ത്താവിന്റെ കാലില്‍ പിടിച്ച് തറയിലൂടെ വലിച്ചിഴച്ചു കൊണ്ടുപോയത്.
വിഡിയോ വൈറലായതോടെ ഇതുസംബന്ധിച്ച് അന്വേഷണം നടത്താന്‍ ആരോഗ്യവകുപ്പ് ഉത്തരവിട്ടു.