പാലക്കാട്: മലമ്പുഴ മണ്ഡലത്തിലെ പ്രളയക്കെടുതി പുനരുദ്ധാരണത്തിന് നടപടികള്‍ സ്വീകരിക്കണമെന്നാവശ്യപ്പെട്ട് ഭരണ പരിഷ്‌ക്കാര കമ്മീഷന്‍ ചെയര്‍മാനും മലമ്പുഴ എം.എല്‍.എയുമായ വി.എസ്.അച്യുതാനന്ദന്‍ നിയമസഭാ പരിസ്ഥിതി സമിതിക്ക് കത്തു നല്‍കി. മണ്ഡലത്തിലെ എട്ട് പഞ്ചായത്തുകളിലായി 300 വീടുകള്‍ പൂര്‍ണമായി തകരുകയും 700 ഓളം എണ്ണം വാസയോഗ്യമല്ലാതാവുകയും ചെയ്തു. നിരവധി പ്രദേശങ്ങളില്‍ കൃഷിയിടങ്ങള്‍ മണ്ണടിഞ്ഞ് കൃഷിയോഗ്യമല്ലാതായി.
പുതുശേരി ഗ്രാമപഞ്ചായത്തിലെ ചെല്ലന്‍കാവ്, ഏരി, ചുള്ളിമട ഏരി, മരുതറോഡ് ഗ്രാമപഞ്ചായത്തിലെ മലമ്പുഴ കനാല്‍ ബണ്ടുകള്‍, ആറങ്ങോട്ടുകുളമ്പ് പാലം, കരിമന്‍കാട് പാലം, പടലിക്കാട് പാലവും റോഡും, എലപ്പുള്ളി ഗ്രാമപഞ്ചായത്തിലെ എടുപ്പുകുളം ചെക്ക് ഡാം, നെല്ലിയാമ്പള്ളം കനാല്‍ ബണ്ട് എന്നിവ ഉള്‍പ്പെടെ പുനര്‍നിര്‍മിക്കാന്‍ ആവശ്യമായ അടിയന്തര നടപടികള്‍ സ്വീകരിക്കണമെന്നാവശ്യപ്പെട്ടാണ് കത്ത്.
പുതുശേരി പഞ്ചായത്തില്‍ മാത്രം 100 ഹെക്ടര്‍ ഭൂമി കൃഷിയോഗ്യമല്ലാതായി. പുതുപ്പരിയാരം കരിങ്കണ്ണി പാടശേഖര സമിതി പ്രദേശത്ത് മാത്രം ഒമ്പത് ഏക്കര്‍ സ്ഥലത്ത് മണ്ണിടിഞ്ഞു കൃഷി യോഗ്യമല്ലാതായി. ദീര്‍ഘകാല അടിസ്ഥാനത്തില്‍ റോഡുകളുടെ അറ്റകുറ്റപ്പണിയും നടത്തേണ്ടതുണ്ട്. വിവിധ വകുപ്പുകളുടെ ഏകോപനവും മതിയായ ഫണ്ട് ലഭ്യമാക്കലും ഉടനടി നടപ്പാക്കണമെന്ന് എം.എല്‍.എ കത്തില്‍ ആവശ്യപ്പെടുന്നുണ്ട്. മലമ്പുഴ ഡാമിന്റെ വൃഷ്ടി പ്രദേശത്തെ പുതുശേരി ഗ്രാമപഞ്ചായത്തിലെ രണ്ടാം വാര്‍ഡില്‍ പ്രവര്‍ത്തിക്കുന്ന ആശുപത്രി മാലിന്യ യൂണിറ്റായ 'ഇമേജി'ന്റെ പ്രവര്‍ത്തനം പരിസ്ഥിതി ആഘാതം സൃ്ഷ്ടിക്കുന്നതിനാല്‍ കമ്പനിയുടെ പ്രവര്‍ത്തനം നിയന്ത്രിക്കണമെന്നും എം.എല്‍.എ കത്തില്‍ പറയുന്നുണ്ട്. കമ്പനി പുറംതള്ളുന്ന മാലിന്യങ്ങള്‍ മലമ്പുഴ റിസര്‍വോയര്‍ വരെ എത്തുന്നുണ്ട്.
കഞ്ചിക്കോട് വ്യവസായ മേഖലയില്‍ വായുമലിനീകരണത്തിന്റെ തോത് കുറയ്ക്കാന്‍ ദീര്‍ഘകാല അടിസ്ഥാനത്തിലുള്ള പ്രവര്‍ത്തനങ്ങള്‍ നടത്തണമെന്നും വി.എസ്.അച്യുതാനന്ദന്‍ എം.എല്‍.എ കത്തില്‍ വ്യക്തമാക്കി ആവശ്യപ്പെട്ടു.