കൊച്ചി: നെടുങ്കണ്ടം ഉരുട്ടിക്കൊലക്കേസില്‍ പൊലിസ് അന്വേഷണം പക്ഷപാതപരമെന്ന് ഹൈക്കോടതി. റിമാന്‍ഡിനു മുന്‍പ് രാജ്കുമാറിന്റെ വൈദ്യപരിശോധന കൃത്യമായിരുന്നില്ല. പരുക്കിനെക്കുറിച്ച് റിപ്പോര്‍ട്ട് നല്‍കുന്നതില്‍ ജയില്‍ അധികൃതര്‍ക്ക് വീഴ്ച സംഭവിച്ചു. എത്ര സാക്ഷികള്‍ വന്നാലും സാഹചര്യതെളിവുകള്‍ മാറ്റാനാകില്ലെന്നും കോടതി പറഞ്ഞു. ഇന്നലെ കേസിലെ ഒന്നാം പ്രതി സാബുവിന്റെ ജാമ്യാപേക്ഷ പരിഗണിക്കവെയാണ് കോടതി ഈ പരാമര്‍ശങ്ങള്‍ നടത്തിയത്.
കേസില്‍ മജിസ്‌ട്രേറ്റ് രേഖകള്‍ ഹാജരാക്കാന്‍ ഹൈക്കോടതി അടിയന്തര നിര്‍ദേശം നല്‍കി. രേഖകള്‍ ഫാക്‌സ് മുഖേന ഇന്നലെ തന്നെ നല്‍കണമെന്നാണ് കോടതി നിര്‍ദേശം നല്‍കിയത്. പൊലിസ് പീഡനത്തെക്കുറിച്ച് പ്രതി മജിസ്‌ട്രേറ്റിനോട് പറഞ്ഞ വിവരങ്ങളടങ്ങിയ രേഖ ഇന്നലെ തന്നെ ഹൈക്കോടതിയില്‍ ഹാജരാക്കണമെന്നു നിര്‍ദേശിക്കുകയായിരുന്നു.
ഇതു സംബന്ധിച്ച രേഖകള്‍ ഹാജരാക്കണമെന്നു ഹൈക്കോടതി മുന്‍പു നിര്‍ദേശിച്ചിരുന്നു. ഇന്നലെ കേസ് പരിഗണിക്കുമ്പോള്‍ ഈ രേഖകള്‍ എത്തിക്കാതിരുന്നതിനെത്തുടര്‍ന്നാണ് എത്രയും പെട്ടെന്നു ഹാജരാക്കണമെന്നു നിര്‍ദേശിച്ചത്. കസ്റ്റഡിയിലിരുന്ന പ്രതിയെ മജിസ്‌ട്രേറ്റിനു മുന്നില്‍ ഹാജരാക്കിയപ്പോഴുള്ള നടപടിക്രമങ്ങള്‍ ഉള്‍ക്കൊള്ളുന്ന രേഖയും ഹാജരാക്കണമെന്നു കോടതി നിര്‍ദേശിച്ചിരുന്നു. കേസ് ഇന്നലെ തന്നെ വീണ്ടും പരിഗണിച്ചെങ്കിലും കൂടുതല്‍ വാദത്തിനായി ഇന്നത്തേക്ക് മാറ്റി.
രാജ്കുമാറിനെ കസ്റ്റഡിയിലെടുത്തത് ഇടുക്കി എസ്.പി ഉള്‍പ്പെടെയുള്ള ഉന്നത ഉദ്യോഗസ്ഥരുടെ അറിവോടെയാണെന്നും ജയിലിലെത്തിക്കുന്നതുവരെ രാജ്കുമാറിന് യാതൊരുവിധ പരുക്കുകളുമില്ലായിരുന്നുവെന്നും സാബുവിന്റെ ഹരജിയില്‍ പറയുന്നു.