ഓമശ്ശേരി: തെച്ചിയാട്, കല്ലുരുട്ടി ഭാഗങ്ങളില്‍ വാഹനാപകടങ്ങള്‍ തുടര്‍ക്കഥയാകുന്നു.
ഡ്രൈവര്‍മാര്‍ മദ്യപിച്ച് വാഹനമോടിക്കുന്നതാണ് മിക്ക അപകടങ്ങള്‍ക്കും കാരണം. അപകടകരമായ തറോല്‍ വളവിലാണ് ഏറ്റവും കൂടുതല്‍ അത്യാഹിതം നടക്കുന്നത്. ഇവിടെ മുന്‍പ് അപകടത്തില്‍പ്പെട്ട വാഹനത്തില്‍ നിന്ന് അഞ്ചു കിലോ കഞ്ചാവ് പിടികൂടിയിരുന്നു.
കഴിഞ്ഞദിവസം തറാവീഹ് നിസ്‌കരിക്കാന്‍ പള്ളിയിലേക്ക് പോവുകയായിരുന്ന തെച്യാട് സ്വദേശി ഉമറിനെ മദ്യപിച്ചെത്തിയ ബൈക്ക് യാത്രികര്‍ ഇടിച്ചു തെറിപ്പിച്ചിരുന്നു. ഇതിന് മുന്‍പും സമാനമായ രീതിയില്‍ നിരവധി അപകടങ്ങള്‍ പ്രദേശത്ത് നടന്നിട്ടും മുന്നറിയിപ്പ് ബോര്‍ഡുകള്‍ വയ്ക്കാനോ പട്രോളിങ് ശക്തമാക്കാനോ അധികൃതര്‍ തയാറായിട്ടില്ലെന്ന് നാട്ടുകാര്‍ പറഞ്ഞു.