ജക്കാര്‍ത്ത: ഇന്തോനേഷ്യയില്‍ കനത്ത മഴയെ തുടര്‍ന്നുണ്ടായ വെള്ളപ്പൊക്കത്തിലും മണ്ണിടിച്ചിലിലും വന്‍ നാശനഷ്ടം. ദുരന്തത്തില്‍ 27 പേര്‍ മരിച്ചതായാണ് വിവരം. ഒട്ടേറെ പേരെ കാണാതാകുകയും നിരവധി പേര്‍ക്കു പരുക്കേല്‍ക്കുകയും ചെയ്തിട്ടുണ്ട്. 15 പേരെ കാണാതായെന്നാണ് ഔദ്യോഗിക സ്ഥിരീകരണം.
കഴിഞ്ഞ ബുധനാഴ്ച മുതലാണ് ഇന്തോനേഷ്യയില്‍ കനത്ത മഴ തുടങ്ങിയത്. ഉത്തര സുമാത്രയില്‍ മാത്രം കനത്ത നാശനഷ്ടമുണ്ടായിട്ടുണ്ട്. വിവിധ ജില്ലകളില്‍ ഗതാഗത, വാര്‍ത്താവിനിമയ, ഇന്റര്‍നെറ്റ്, വൈദ്യുത സേവനങ്ങള്‍ തടസപ്പെട്ടിരിക്കുകയാണ്. കെട്ടിടങ്ങളും വീടുകളും വ്യാപകമായി തകര്‍ന്നിട്ടുണ്ട്.
മരിച്ചവരില്‍ ഏറെയും കുട്ടികളാണ്. മുവാറ സലാദി ഗ്രാമത്തിലെ ഒരു സ്‌കൂളില്‍നിന്ന് 21 കുട്ടികളെ കാണാതായിരുന്നു. ഇവരില്‍ 12 പേരുടെ മൃതദേഹങ്ങള്‍ പിന്നീട് കണ്ടെത്തി.