തിരുവനന്തപുരം: ദുരിതബാധിതര്‍ക്കും രക്ഷാപ്രവര്‍ത്തകര്‍ക്കും ആശ്വാസമയി സംസ്ഥാനത്ത് മഴയുടെ തോത് കുറയുന്നു. സംസ്ഥാനത്തെവിടെയും ഇപ്പോള്‍ അതിതീവ്ര മഴയുടെ മുന്നറിയിപ്പായ റെഡ് അലര്‍ട്ട് നിലവിലില്ല. അതേസമയം ആലപ്പുഴ, എറണാകുളം, ഇടുക്കി, വയനാട്, കണ്ണൂര്‍, മലപ്പുറം ജില്ലകളില്‍ നാളെ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. മഴയുടെ തീവ്രത കുറഞ്ഞതോടെ ഉരുള്‍പൊട്ടല്‍ കനത്ത നാശം വിതച്ച കവളപ്പാറയിലും പുത്തുമലയിലും കാണാതായവര്‍ക്കായുള്ള തെരച്ചില്‍ സജീവമായി തുടരുന്നു.

കൂടുതല്‍ മൃതദേഹങ്ങള്‍ കണ്ടെടുത്തതോടെ സംസ്ഥാനത്ത് ഇതുവരെ മരിച്ചവരുടെ എണ്ണം 83 ആയി. കവളപ്പാറയില്‍ ഇന്ന് മാത്രം അഞ്ച് മൃതദേഹങ്ങള്‍ കണ്ടെത്തി. ഇനി 41 പേരെയാണ് ഇവിടെ നിന്നും കണ്ടെത്താനുള്ളത്. സൈന്യവും ദേശീയ ദുരന്ത നിവാരണ സേനയും നാട്ടുകാരും സംയുക്തമായാണ് തിരച്ചില്‍ നടത്തുന്നത്. കൂടുതല്‍ മണ്ണ്മാന്തി യന്ത്രങ്ങള്‍ ഇവിടേക്ക് എത്തിച്ചിട്ടുണ്ട്. എട്ട് ഹിറ്റാച്ചികള്‍ കവളപ്പാറയില്‍ എത്തിയിട്ടുണ്ട്. വയനാട് പുത്തുമലയില്‍ 10 മൃതദേഹങ്ങളാണ് ഇതുവരെ കണ്ടെത്തിയത്. ഔദ്യോഗിക കണക്ക് പ്രകാരം ഇനി ഏഴുപേരെയാണ് കണ്ടെത്താനുള്ളത്. ഇന്നും ഇന്നലെയും കാര്യമായി മഴ പെയ്യാത്തതിനാല്‍ രക്ഷാപ്രവര്‍ത്തനം കാര്യക്ഷമമായി നടക്കുന്നുണ്ട്. അതിതീവ്ര മഴയുടെ മുന്നറിയിപ്പായ റെഡ് അലര്‍ട്ട് ഇന്ന് എവിടെയും പ്രഖ്യാപിച്ചിട്ടില്ല. എറണാകുളത്തും ആലപ്പുഴയിലും ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്.

അതേസമയം വടക്കുകിഴക്കന്‍ ബംഗാള്‍ ഉള്‍ക്കടലില്‍ പുതുതായി രൂപപ്പെട്ട ചുഴി അടുത്ത 24 മണിക്കൂറിനുളളില്‍ ന്യൂനമര്‍ദ്ദമായി മാറി വടക്കുപടിഞ്ഞാറന്‍ ദിശയിലേക്ക് സഞ്ചരിക്കാന്‍ സാധ്യതയുണ്ടെന്ന് കാലാവസ്ഥ വിദഗ്ധര്‍ മുന്നറിയിപ്പ് നല്‍കിയിട്ടുണ്ട്. ഇതേ തുടര്‍ന്ന് സംസ്ഥാനത്തും ഒറ്റപ്പെട്ട കനത്ത മഴക്ക് സാധ്യതയുണ്ടെന്ന് പ്രവചനുമുണ്ട്. മധ്യകേരളത്തിലും തെക്കന്‍ കേരളത്തിലുമാണ് ശക്തമായ മഴ ലഭിക്കുക. എന്നാല്‍ പ്രളയത്തിന് കാരണമായ അതിതീവ്ര മഴക്ക് സാധ്യതയില്ലെന്നും ആശങ്കപ്പെടേണ്ട സാഹചര്യമില്ലെന്നും കാലാവസ്ഥ വകുപ്പ് അറിയിച്ചു.