പ്രളയബാധിത ജില്ലകളിലെ പരീക്ഷ മാറ്റിവയ്ക്കണമെന്ന് കെ.എസ്.ടി.യു
തിരുവനന്തപുരം: സംസ്ഥാനത്ത് ഓണപ്പരീക്ഷ മാറ്റിവയ്ക്കില്ലെന്ന് ഡി.ജി.ഇ ജീവന്‍ബാബു.
പ്രളയവും പേമാരിയുംമൂലം അധ്യയന ദിവസങ്ങള്‍ നഷ്ടപ്പെട്ടെങ്കിലും പരീക്ഷ മാറ്റിവയ്‌ക്കേണ്ട സാഹചര്യമില്ല. ഈ മാസം 26 മുതലാണ് ഓണപ്പരീക്ഷ നടത്താന്‍ തീരുമാനിച്ചിരിക്കുന്നതെന്നും അദ്ദേഹം പറഞ്ഞു.
അതേസമയം, പ്രളയബാധിത ജില്ലകളിലെ ഓണപ്പരീക്ഷ മാറ്റിവയ്ക്കണമെന്ന് കെ.എസ്.ടി.യു സംസ്ഥാന കമ്മിറ്റി ആവശ്യപ്പെട്ടു. പ്രളയബാധിത പ്രദേശങ്ങളില്‍ ഉറ്റവരും ഉടയവരും നഷ്ടപ്പെട്ടവരും പ്രളയഭീതിയില്‍ അകപ്പെട്ടവരുമായ നൂറുകണക്കിന് കുട്ടികള്‍ മാനസിക സംഘര്‍ഷത്തിലാണ്.
പല വിദ്യാലയങ്ങളും പ്രളയത്തില്‍ അകപ്പെട്ടു. നിരവധി വിദ്യാലയങ്ങള്‍ ദുരിതാശ്വാസ ക്യാംപുകളായും പ്രവര്‍ത്തിക്കുന്നു. അവിടങ്ങളിലൊക്കെ ദിവസങ്ങളോളം പഠനപ്രവര്‍ത്തനങ്ങള്‍ നടന്നിട്ടില്ല.
വിദ്യാഭ്യാസ വകുപ്പ് യാഥാര്‍ഥ്യം ഉള്‍ക്കൊള്ളാതെ പ്രളയബാധിത പ്രദേശങ്ങളില്‍ പരീക്ഷ നടത്താന്‍ നിര്‍ബന്ധിക്കുകയാണ്. പരീക്ഷ മാറ്റിവച്ചാല്‍ സാമ്പത്തിക പ്രതിസന്ധിയൊന്നും ഉണ്ടാകില്ലെന്നും കെ.എസ്.ടി.യു സംസ്ഥാന പ്രസിഡന്റ് എ.കെ സൈനുദ്ദീന്‍ ആവശ്യപ്പെട്ടു .