ഡസ്സല്‍ഡോര്‍ഫ് (ജര്‍മനി): ത്രിരാഷ്ട്ര ഹോക്കി പരമ്പരയിലെ രണ്ടാം മത്സരത്തില്‍ ഇന്ത്യ കരുത്തരായ ജര്‍മനിയെ സമനിലയില്‍ തളച്ചു. 2-2നാണ് ഇന്ത്യ- ജര്‍മനി പോരാട്ടം സമനിലയില്‍ അവസാനിച്ചത്. 13ാം മിനുട്ടില്‍ നിക്‌ലസ് വെല്ലനിലൂടെ ജര്‍മനി ലീഡെടുത്തെങ്കിലും 45ാം മിനുട്ടില്‍ സെക്കന്‍ഡുകളുടെ മാത്രം വ്യത്യാസത്തില്‍ ഇന്ത്യ തുടരെ രണ്ട് ഗോളുകള്‍ നേടി ലീഡ് സ്വന്തമാക്കി. മന്‍ദീപ് സിങും പിന്നാലെ സര്‍ദാര്‍ സിങുമാണ് ഇന്ത്യക്കായി വല ചലിപ്പിച്ചത്. എന്നാല്‍ 52ാം മിനുട്ടില്‍ പരിചയ സമ്പന്നനായ തോബിയാസ് ഹൗകെ ജര്‍മനിക്ക് സമനില ഗോള്‍ സമ്മാനിക്കുകയായിരുന്നു. തങ്ങളുടെ ആദ്യ മത്സരങ്ങളില്‍ ഇന്ത്യയും ജര്‍മനിയും ബെല്‍ജിയത്തിനോട് തോല്‍വി വഴങ്ങിയാണ് രണ്ടാം മത്സരത്തിനിറങ്ങിയത്.