നീലേശ്വരം: മത്സ്യത്തൊഴിലാളികള്‍ക്കു ഭീഷണിയായി പുഴയിലും കടല്‍ മാക്രികള്‍. കോട്ടപ്പുറം പുഴയിലാണ് വലിയ ഇനം കടല്‍ മാക്രികളെ കണ്ടെത്തിയത്. കടലില്‍ സാധാരണയായി കണ്ടുവരുന്ന ഇവ അപൂര്‍വമായാണ് പുഴയിലേക്കു വരുന്നത്. പുഴയില്‍ ചെറിയ വലകള്‍ ഉപയോഗിച്ച് മീന്‍പിടിക്കുന്നവര്‍ക്കാണ് ഇതു ഭീഷണിയായി തീര്‍ന്നത്.
വലയില്‍ കുടുങ്ങുന്ന ഇവ വല പൂര്‍ണമായും കടിച്ചു മുറിച്ചു നശിപ്പിക്കും. ചെറിയ ഇനങ്ങള്‍ സാധാരണയായി ഉണ്ടാകാറുണ്ടെന്നും ആദ്യമായാണ് ഇവിടെ വലിയ ഇനത്തെ കാണുന്നതെന്നും തൊഴിലാളികള്‍ പറഞ്ഞു. തവളയുടെ വലുപ്പമാണെങ്കിലും ഇവയുടെ ശരീരത്തില്‍ തട്ടിയാല്‍ വളര്‍ന്നു വലുതാകും. മനുഷ്യമുഖത്തോടു സാമ്യമുള്ളതാണ് വളര്‍ന്ന രൂപം.