ബാഴ്‌സലോണ: പരുക്കിന്റെ പിടിയിലായിരുന്ന ബാഴ്‌സലോണന്‍ താരം ലയണല്‍ മെസ്സി അടുത്ത മത്സരത്തില്‍ ടീമില്‍ തിരിച്ചെത്തും. ആദ്യ മത്സരത്തില്‍ പരുക്ക് കാരണം മെസ്സി ഇറങ്ങാത്തത് ബാഴ്‌സലോണക്ക് വലിയ തിരിച്ചടി ആയിരുന്നു.
ലീഗിലെ ആദ്യ മത്സരം പരാജയപ്പെട്ട ബാഴ്‌സ പെട്ടെന്ന് തന്നെ വിജയവഴിയില്‍ എത്താനുള്ള ശ്രമത്തിലാണ്.
റയല്‍ ബെറ്റിസിനെതിരേ ആണ് ബാഴ്‌സലോണയുടെ അടുത്ത മത്സരം. സുവാരസും പരുക്കേറ്റ് പുറത്താണ് എന്നതിനാല്‍ മെസ്സിയുടെ തിരിച്ചുവരവ് ബാഴ്‌സക്ക് അത്യാവശ്യമാണ്. മെസ്സിക്ക് ഒപ്പം ബ്രസീലിയന്‍ യുവതാരം ആര്‍തറും രണ്ടാം മത്സരത്തിന് എത്തും. ആദ്യ മത്സരത്തില്‍ മികച്ച ജയം സ്വന്തമാക്കിയ റയല്‍ മാഡ്രിഡാണ് നിലവില്‍ പോയിന്റ് ടേബിളില്‍ ഒന്നാം സ്ഥാനത്ത് നില്‍ക്കുന്നത്. അടുത്ത മത്സരത്തില്‍ റയല്‍ മാഡ്രിഡ് വല്ലഡോളിഡിനെയാണ് നേരിടുക.
അത്‌ലറ്റികോ
മാഡ്രിഡിന് ജയം
മാഡ്രിഡ്: ലീഗിലെ ആദ്യ മത്സരത്തില്‍ അത്‌ലറ്റികോ മാഡ്രിഡിന് ജയം. ഇന്നലെ നടന്ന മത്സരത്തില്‍ ഗറ്റാഫയെയാണ് അത്‌ലറ്റികോ പരാജയപ്പെടുത്തിയത്. 1-0 എന്ന സ്‌കോറിനായിരുന്നു സിമിയോണിയുടെ കുട്ടികള്‍ ഗറ്റാഫയെ തകര്‍ത്തത്.
23-ാം മിനുട്ടില്‍ സ്പാനിഷ് താരം അല്‍വാരോ മൊറാട്ടയാണ് അത്‌ലറ്റികോ മാഡ്രിഡിന് വേണ്ടി വിജയ ഗോള്‍ കണ്ടെത്തിയത്. മത്സരം പരുക്കനായതിനെ തുടര്‍ന്ന് ഇരു ടീമിലേയും ഓരോ താരങ്ങള്‍ ചുവപ്പ് കാര്‍ഡ് കണ്ട് പുറത്തായി. 38-ാം മിനുട്ടില്‍ ഗറ്റാഫെ താരം ജോര്‍ഗ് വിദാലാണ് ആദ്യ ചുവപ്പ് കാര്‍ഡ് കണ്ടത്. 42-ാം മിനുട്ടില്‍ അത്‌ലറ്റികോ താരം റീനന്‍ ലോഡിയും ചുവപ്പ് കാര്‍ഡ് കണ്ട് പുറത്തായി. ഇതോടെ ആദ്യ പകുതിയില്‍ തന്നെ രണ്ട് ടീമും പത്ത് പേരായി ചുരുങ്ങി. മറ്റൊരു മത്സരത്തില്‍ വല്ലഡോളിഡ് റയല്‍ ബെറ്റിസിനെ 2 - 1 എന്ന സ്‌കോറിന് തകര്‍ത്തു. എട്ടാം മിനുട്ടില്‍ ബെറ്റിസ് താരം യോള്‍ റോബ്ലസ് ചുവപ്പ് കാര്‍ഡ് കണ്ട് പുറത്തായതാണ് ബെറ്റിസിന് തിരിച്ചടിയായത്.