കാബൂള്‍: അഫ്ഗാനിസ്ഥാനിലെ ഹെറാത് നഗരത്തില്‍ പള്ളിക്കു പുറത്തുണ്ടായ സ്‌ഫോടനത്തില്‍ ഏഴുപേര്‍ കൊല്ലപ്പെട്ടു. 15 പേര്‍ക്ക് പരുക്കേറ്റിട്ടുണ്ട്. ജുമാ മസ്ജിദിന് പുറത്ത് പാര്‍ക്കിങ് ഏരിയയില്‍ മോട്ടോര്‍ സൈക്കിളില്‍ ഒളിപ്പിച്ച നിലയിലായിരുന്നു സ്‌ഫോടക വസ്തുക്കള്‍. സ്‌ഫോടനമുണ്ടായ പള്ളി അഫ്ഗാനിലെ തന്നെ വലിയ പള്ളികളിലൊന്നാണ്.
പന്ത്രണ്ടാം നൂറ്റാണ്ടില്‍ നിര്‍മിച്ച പള്ളിയാണിത്. പള്ളിയില്‍ പ്രാര്‍ഥനയ്ക്കായി പോകുകയായിരുന്നവരാണ് കൊല്ലപ്പെട്ട ഏഴുപേരും പരുക്കേറ്റ 15 പേരുമെന്ന് ഹെറാത് പൊലിസ് വക്താവ് അബ്ദുല്‍ അഹദ് വലിസദ പറഞ്ഞു. അഫ്ഗാനിലെ വലിയ നഗരങ്ങളിലൊന്നാണ് ഹെറാത്. ഇറാനുമായി അതിര്‍ത്തി പങ്കിടുന്ന നഗരമാണിത്. കാബൂളിലുണ്ടായ സ്‌ഫോടനത്തില്‍ 150 പേര്‍ കൊല്ലപ്പെട്ട് ഒരാഴ്ച തികയും മുന്‍പാണ് അടുത്ത ആക്രമണം നടന്നിരിക്കുന്നത്. തുടര്‍ന്ന് നടന്ന പ്രതിഷേധത്തിലും പൊലിസുമായുണ്ടായ സംഘര്‍ഷത്തില്‍ വെള്ളിയാഴ്ച നിരവധിയാളുകള്‍ കൊല്ലപ്പെട്ടിരുന്നു.