റമദാനിലെ കാരുണ്യത്തിന്റെ ദിനരാത്രങ്ങള്‍ വിടപറഞ്ഞു.ആദ്യപത്തില്‍ നാഥന്റെ കാരുണ്യം കരഗതമാക്കാന്‍ കരങ്ങള്‍ നീട്ടി ഇരന്നതിന്റെ സംതൃപ്തിയോടെയാണ് വിശ്വാസി അടുത്ത സുവര്‍ണ നിമിഷങ്ങളെ സമീപിക്കുന്നത്. കാലുഷ്യം നിറഞ്ഞ നവലോക ക്രമത്തില്‍ നോമ്പ് മുന്നോട്ട് വെക്കുന്ന ലക്ഷ്യം പലരും നിരാകരിക്കുന്നത് ഖേദകരമാണ്.

കാലത്തിന്റെ കുത്തൊഴുക്കില്‍ മനുഷ്യന്റെ സ്വഭാവത്തില്‍ വന്ന വ്യതിയാനം പോലെ തന്നെ റമദാനെ ആതിഥേയ മര്യാദയോടെ പരിഗണിക്കുന്ന സുകൃതമാര്‍ഗവും കൈമോശം വരുകയാണ്. ചിലര്‍ ഈ വിശുദ്ധ സമയങ്ങളില്‍ പോലും തിന്നാനും കുടിക്കാനും കളി തമാശകളില്‍ ഏര്‍പ്പെടാനുമുള്ള നിമിഷങ്ങളായി കണക്കാക്കുന്നു.മറ്റു ചിലര്‍ ഈ കാലത്തെ ബിസിനസ് വത്കരിച്ച് ഭൗതിക ലാഭം കൊയ്യാന്‍ ശ്രമിക്കുന്നു. എന്നാല്‍ തിന്മകളിലേക്ക് പോകാന്‍ ധാരാളം സാധ്യതകളുള്ള ആധുനിക കാലത്ത് മുന്‍ഗാമികളുടെ ചര്യകളെ മുറുകെ പിടിച്ചാല്‍ മാത്രമേ നമുക്ക് വിജയിക്കാന്‍ കഴിയുകയുള്ളൂ.ഭക്ഷണ പാനീയങ്ങള്‍ ഒഴിവാക്കുന്നത് കൊണ്ട് മാത്രം ഒരിക്കലും വ്രതവിശുദ്ധി ലഭിക്കുകയില്ല, മറിച്ച് മനസും ശരീരവും നന്‍മകളിലേക്ക് ചേര്‍ത്ത് പിടിക്കാന്‍ കഴിയണം.
നോമ്പ് ഒരു പരിചയാണ് എന്ന പുണ്യവചനം മനസിലാക്കുമ്പോഴാണ് അതില്‍ അന്തര്‍ലീനമായ അര്‍ഥ വ്യാപ്തി ബോധ്യപ്പെടുന്നത്.നന്മകള്‍ പ്രവര്‍ത്തിച്ചും ആത്മാര്‍ഥതയോടെ പ്രാര്‍ഥിച്ചും അരുതായ്മകളില്‍ നിന്ന് അകന്ന് നിന്നുമാണ് നോമ്പിനെ പരിചയാക്കേണ്ടത്. അത് മുന്നോട്ടുള്ള കാലത്തേക്കുള്ള വെളിച്ചമായി മാറ്റേണ്ടതുണ്ട്.എങ്കില്‍ മാത്രമേ നമുക്ക് സ്വര്‍ഗം നേടാന്‍ കഴിയുകയുള്ളൂവെന്ന് തിരിച്ചറിയണം.
പകലന്തിയോളം അന്നപാനീയങ്ങള്‍ ഉപേക്ഷിച്ചത് കൊണ്ട് മാത്രം നോമ്പ് പൂര്‍ണമാകുകയില്ല. ദേഹവും ദേഹിയും സ്ഫുടം ചെയ്‌തെടുക്കാന്‍ തിരനബി (സ) പഠിപ്പിച്ച പാഠങ്ങള്‍ പ്രകടനപരതയില്ലാതെ ജീവിതത്തില്‍ പകര്‍ത്തുമ്പോഴാണ് നോമ്പ് അതിന്റെ ഉത്തുംഗതയിലെത്തുന്നത്. മനുഷ്യര്‍ പരസ്പരം കലഹിച്ചും വഞ്ചിച്ചും ജീവിക്കുന്ന കാഴ്ചയാണ് എവിടെയും.സ്വാര്‍ഥതയുടെ വാഹകരായി മുഷ്യര്‍ മാറിയ സാഹചര്യത്തില്‍ അധാര്‍മ്മിതകതയെ തടുക്കാന്‍ കരുത്തുള്ള പരിചയായി നോമ്പിനെ പരിചയപ്പെടുത്തുകയാണ് കാലികമായ പ്രബോധനം.
( എസ്.കെ.എസ്.എസ്.എഫ് സംസ്ഥാന സെക്രട്ടറിയേറ്റ് അംഗമാണ് ലേഖകന്‍)