മണ്ണാര്‍ക്കാട്: അനധികൃതകമായി ആഡംബര കാറില്‍ കൊണ്ടുവന്ന കോഴികുഞ്ഞുങ്ങളെ പൊലിസ് പിടികൂടി. തമിഴ്‌നാട്ടില്‍ നിന്നും ശ്രീകൃഷ്ണപുരം, മണ്ണാര്‍ക്കാട് മേഖലകളിലെ കോഴി ഫാമുകളിലേക്ക് കൊണ്ടുവന്ന കോഴി കുഞ്ഞുങ്ങളെയാണ്  പിടികൂടി പിഴയിട്ടത്. നാട്ടുകല്‍ പൊലിസ് രണ്ട് വഹനത്തെയും, ശ്രീകൃഷ്ണപുരം പൊലിസ് ഒരു വാഹനത്തെയുമാണ് ഇന്നലെ പിടികൂടിയത്.
ആര്യമ്പാവ് - ശ്രീകൃഷ്ണപുരം റോഡില്‍ നായാടിപ്പാറയില്‍ ആഡംബര കാറില്‍ കൊണ്ടുവന്ന കോഴി കുഞ്ഞുങ്ങളെ ശ്രീകൃഷ്ണപുരം പൊലീസാണ് പിടികൂടിയത്. പിഴ സംബന്ധിച്ച് പൊലിസും വാഹനത്തിലുളളവരും തമ്മില്‍ തര്‍ക്കം രൂക്ഷമായതിനെ തുടര്‍ന്ന് വില്‍പ്പന നികുതി ഇന്റലിജന്‍സ്  വിഭാഗം ഉദ്ദ്യോഗസ്ഥരെത്തി പിഴയിട്ടാണ് വാഹനത്തെയും കോഴികുഞ്ഞുങ്ങളെയും വിട്ടയച്ചത്.
സമയം ഏറെ കഴിഞ്ഞത് കാരണം നിരവധി കോഴികുഞ്ഞുങ്ങള്‍ ചത്തൊടുങ്ങി. ശ്രീകൃഷ്ണപുരം പൊലിസ് പിടികൂടിയ ഒരു വാഹനത്തിലെ 7200 കോഴികുഞ്ഞുങ്ങള്‍ക്ക് 1.8 ലക്ഷം രൂപയാണ് പിഴയിട്ടത്. നാട്ടുകല്‍ പൊലിസ് പിടികൂടിയ ഒരു വാഹനത്തിന് 76125 രൂപയും മറ്റൊരുവാഹനത്തിന് 30450 രൂപയുമാണ് അധികൃതരെത്തി പിഴചുമത്തിയത്.
എസ്.ഐമാരായ കൃഷ്ണന്‍ (ശ്രീകൃഷ്ണപുരം), മുരളീധരന്‍ (നാട്ടുകല്‍) വില്‍പ്പന നികുതി ഇന്റലിജന്‍സ് ജീവനക്കാരായ സഞ്ജീപ്, ബാലരാജ്, മനോജ് എന്നിവരുടെ നേതൃത്വത്തിലുളള സംഘമാണ് വാഹനം പിടിച്ച് പിഴചുമത്തിയത്.