തിരുവനന്തപുരം: സുപ്രിം കോടതി വിധിയുടെ പശ്ചാത്തലത്തില്‍ ശബരിമലയില്‍ യുവതികള്‍ പ്രവേശിക്കാതിരിക്കാന്‍ സംസ്ഥാനത്തൊട്ടാകെ സംഘ്പരിവാര്‍ സംഘടനകളും ബി.ജെ.പിയും നിയോഗിച്ചത് 5000 പ്രവര്‍ത്തകരെ.
നടതുറക്കുന്നത് മുതലുള്ള അഞ്ചു ദിവസം ശബരിമല, പമ്പ, നിലയ്ക്കല്‍ പ്രദേശങ്ങളില്‍ തങ്ങി യുവതി പ്രവേശനം തടയുന്നതിന് നേതാക്കളെ സഹായിക്കുകയെന്നതാണ് ഇവര്‍ക്ക് സംഘടനാ തലത്തില്‍ നല്‍കിയ നിര്‍ദേശം. ഇവരുടെ പ്രവര്‍ത്തനങ്ങളെ നിയന്ത്രിക്കുന്നതിനായി ബി.ജെ.പി സംസ്ഥാന ജനറല്‍ സെക്രട്ടറിമാരായ ശോഭാ സുരേന്ദ്രന്‍, കെ.സുരേന്ദ്രന്‍, എം.ടി.രമേശ് എന്നിവര്‍ക്കു പുറമെ സംസ്ഥാന നേതൃത്വത്തില്‍നിന്നു നേരത്തെ പുറത്താക്കിയ വി.വി.രാജേഷും വിശ്വഹിന്ദു പരിഷത്ത്, ഹിന്ദു ഐക്യവേദി, ആര്‍.എസ്.എസ് തുടങ്ങി വിവിധ ഹിന്ദു സംഘടനകളുടെ നേതാക്കളും ഇവിടങ്ങളില്‍ ഉണ്ടായിരുന്നു.
സംഘ്പരിവാറിന്റെ അജന്‍ഡ നടപ്പാക്കുന്നതിനായി ശബരിമലയിലും മറ്റുമായി അയ്യായിരത്തോളം പ്രവര്‍ത്തകര്‍ അഞ്ചു ദിവസം തമ്പടിച്ചിട്ടും അതു കണ്ടെത്താനോ നടപടി സ്വീകരിക്കാനോ പൊലിസിന് കഴിഞ്ഞില്ല. ഇവര്‍ മാധ്യമപ്രവര്‍ത്തകര്‍ക്കുനേരെ ആക്രമണം നടത്തുമെന്ന പൊലിസ് മുന്നറിയിപ്പിന്റെ അടിസ്ഥാനത്തിലാണ് കഴിഞ്ഞ ദിവസം തന്നെ ജനം ചാനലിന്റെ ഒഴികെയുള്ള മാധ്യമപ്രവര്‍ത്തകര്‍ ശബരിമല റിപ്പോര്‍ട്ടിങ് അവസാനിപ്പിച്ച് സ്ഥലംവിട്ടത്.
ശബരിമലയുടെ പേരില്‍ ഇപ്പോള്‍ ലഭിച്ചിരിക്കുന്ന അനുകൂലമായ രാഷ്ട്രീയ സാഹചര്യം പ്രയോജനപ്പെടുത്തുന്നതിനായി വരുംദിവസങ്ങളിലും ശക്തമായ സമരപരിപാടികള്‍ സംഘടിപ്പിക്കുന്നതിനാണ് ബി.ജെ.പിയും സംഘ്പരിവാര്‍ സംഘടനകളും തീരുമാനിച്ചിട്ടുള്ളത്.
ഇതിന്റെ ഭാഗമായി പഞ്ചായത്തു തല ഉപവാസം വരുംദിവസങ്ങളില്‍ സംഘടിപ്പിക്കും. കൂടാതെ നവംബര്‍ ഒന്നു മുതല്‍ 15 വരെ ജില്ലാതല പദയാത്രയും നിശ്ചയിച്ചിട്ടുണ്ട്.
ഇക്കാര്യങ്ങളെക്കുറിച്ച് കൂടുതല്‍ ആലോചിക്കുന്നതിനായി അടുത്ത ദിവസം തന്നെ ബി.ജെ.പി കോര്‍ കമ്മിറ്റി യോഗം ചേരും.