മഥുര: ഉത്തര്‍ പ്രദേശിലെ മഥുരയില്‍ സര്‍ക്കാര്‍ അനാഥാലയത്തിലെ രണ്ട് നവജാത ശിശുക്കള്‍ ഭക്ഷ്യ വിഷബാധയെത്തുടര്‍ന്ന് മരിച്ചു. എട്ട് കുട്ടികളുടെ നില ഗുരുതരമാണ്. അതിസാരത്തെ തുടര്‍ന്നാണ് കുട്ടികളെ ജില്ലാ ആശുപത്രിയില്‍ പ്രവേശിപ്പിച്ചത്.
മഥുരയിലെ രാജകീയ ശിശു സദനത്തിലാണ് സംഭവം. ബുധനാഴ്ച നല്‍കിയ പാലില്‍ നിന്നാണ് വിഷബാധയുണ്ടായതെന്നാണ് സംശയിക്കുന്നത്. സാമ്പിള്‍ പരിശോധനക്കായി അയച്ചിട്ടുണ്ട്. സംഭവത്തില്‍ അന്വേഷണത്തിന് ജില്ലാ കലക്ടര്‍ ഉത്തരവിട്ടിട്ടുണ്ട്. പത്ത് കുട്ടികളില്‍ ഗുരുതരാവസ്ഥയിലുള്ള കുട്ടികളെ ആഗ്രയിലെ മെഡിക്കല്‍ കോളേജ് ആശുപത്രിയിലേക്കു മാറ്റിയിരിക്കുകയാണ്.