മുക്കം: മുഴുവന്‍ ക്ലാസുകളിലും സ്വയം ഇംഗ്ലീഷ്, മലയാളം കുട്ടി പത്രങ്ങളൊരുക്കി പന്നിക്കോട് എ.യു.പി സ്‌കൂള്‍ വിദ്യാര്‍ഥികള്‍. സ്‌കൂളിലെ ഇംഗ്ലീഷ് ക്ലബിന്റെയും ജേണലിസം ക്ലബിന്റെയും നേതൃത്വത്തിലാണ് പത്രങ്ങള്‍ തയാറാക്കിയത്.
പഠന പ്രവര്‍ത്തനങ്ങളുടെ ഭാഗമായി വിദ്യാര്‍ഥികള്‍ക്ക് മാധ്യമ പ്രവര്‍ത്തന മേഖലയെ കുറിച്ച് ആഴത്തിലുള്ള അറിവ് നല്‍കുക എന്ന ലക്ഷ്യത്തോടെയാണ് പത്രനിര്‍മാണം സംഘടിപ്പിച്ചതെന്ന് പ്രധാനാധ്യാപിക കെ.കെ ഗംഗ പറഞ്ഞു. പത്രത്തിന്റെ തലക്കെട്ട് മുതല്‍ ലേ ഔട്ട് വരെയുള്ള മുഴുവന്‍ പ്രവര്‍ത്തനങ്ങളും നടത്തിയത് ക്ലാസ് ടീച്ചര്‍മാരുടെ സഹായത്തോടെ വിദ്യാര്‍ഥികള്‍ തന്നെയായിരുന്നു. മികച്ച ക്ലാസ് പത്രത്തിന് സമ്മാനവും നല്‍കി. പരിപാടികള്‍ക്ക് പി.ടി.എ പ്രസിഡന്റ് ബഷീര്‍ പാലാട്ട്, പ്രധാനാധ്യാപിക കെ.കെ ഗംഗ, പി.പി റസ് ല, വി.പി ഗീത, ഹക്കീം കളന്‍തോട്, രമ്യ സുമോദ്, ഐ. ശങ്കരനാരായണന്‍, വി.പി ഉണ്ണികൃഷ്ണന്‍, സജിത ശ്രീനു, രമേശന്‍ നേതൃത്വം നല്‍കി.