വെങ്ങപ്പള്ളി: സംസ്ഥാന വാഫി കലോത്സവത്തിന്റെ എ സോണ്‍ മത്സരങ്ങള്‍ക്ക് ശംസുല്‍ ഉലമാ ഇസ്‌ലാമിക് അക്കാദമിയില്‍ വര്‍ണാഭമായ തുടക്കം. സി. മമ്മൂട്ടി എം.എല്‍.എ ഉദ്ഘാടനം ചെയ്തു. മൂല്യബോധമുള്ള കലകള്‍ പരിപോഷിപ്പിക്കുന്നതില്‍ പുതുതലമുറ കൂടുതല്‍ ഔത്സുക്യം കാണിക്കേണ്ടതുണ്ടെന്നും വാഫി കലോത്സവങ്ങളിലൂടെ അത്തരം ഉദ്യമങ്ങള്‍ നടന്നുകാണുന്നത് ആശാവഹമാണെന്നും അദ്ദേഹം അഭിപ്രായപ്പെട്ടു.
വിവിധ മത്സരങ്ങളിലായി 16 കോളജുകളില്‍ നിന്നായി നാന്നൂറോളം വിദ്യാര്‍ഥികളാണ് രണ്ട് ദിവസങ്ങളിലായി നടക്കുന്ന എ സോണ്‍ കലോത്സവത്തില്‍ പങ്കെടുക്കുന്നത്. ഉദ്ഘാടന സംഗമത്തില്‍ സമസ്ത ജില്ലാ പ്രസിഡന്റ് കെ.ടി ഹംസ മുസ്‌ലിയാര്‍ അധ്യക്ഷനായി. ഇബ്‌റാഹീം ഫൈസി പേരാല്‍ മുഖ്യപ്രഭാഷണം നടത്തി. പിണങ്ങോട് അബൂബക്കര്‍ ഹാജി, മുഹമ്മദ് കുട്ടി ഹസനി, നാസര്‍ മൗലവി, അഷ്‌റഫ് ഫൈസി പനമരം, അബ്ബാസ് ഫൈസി പിണങ്ങോട്, സൈനുല്‍ ആബിദ് ദാരിമി, ഖാസിം ദാരിമി പന്തിപ്പൊയില്‍, അയ്യൂബ് മാസ്റ്റര്‍ മുട്ടില്‍, പനന്തറ മുഹമ്മദ്, സാജിദ് ബാഖവി, ഇ.ടി ഇബ്‌റാഹീം മൗലവി, നാസര്‍ പാച്ചൂരാന്‍, അനീസ് വാഫി എന്നിവര്‍ സംബന്ധിച്ചു. സിയാസ ചെയര്‍മാന്‍ സവാദ് കുഞ്ഞോം നന്ദി പറഞ്ഞു.