ബാസിത് ഹസന്‍
തൊടുപുഴ: തുലാമഴ കൂടി കനിഞ്ഞാല്‍ ഇക്കുറി ജലശേഖരം 90 ശതമാനം കവിയുമെന്ന് കെ.എസ്.ഇ.ബി വിലയിരുത്തല്‍. ഇന്നലെ രാവില ഏഴുമണിയിലെ കണക്കുപ്രകാരം 2459.092 ദശലക്ഷം യൂനിറ്റ് വൈദ്യുതിക്കുള്ള വെള്ളം സംഭരണികളിലുണ്ട്. ഇതു മൊത്തം സംഭരണശേഷിയുടെ 59.4 ശതമാനമാണ്. ഓഗസ്റ്റ് ഒന്നു മുതല്‍ 31 വരെ 1513 ദശലക്ഷം യൂനിറ്റിനുള്ള നീരൊഴുക്കാണ് കെ.എസ്.ഇ.ബി പ്രതീക്ഷിച്ചത്.
എന്നാല്‍ ലഭിച്ചത് 2126.962 ദശലക്ഷത്തിനുള്ള നീരൊഴുക്കും. മൊത്തം സംഭരണ ശേഷിയുടെ 40 ശതമാനത്തോളം വെള്ളമാണ് ഒരു മാസത്തിനിടെ കൂടിയത്. ഓഗസ്റ്റ് ഒന്നിന് 21.01 ശതമാനമായിരുന്നു ജലശേഖരം. ജൂലൈ മാസത്തില്‍ വെറും 10 ശതമാനത്തിന്റെ വര്‍ധനവാണുണ്ടായത്.
ഇടുക്കി, ഇടമലയാര്‍, ശബരിഗിരി എന്നീ പ്രധാന അണക്കെട്ടുകളില്‍ ജലനിരപ്പ് 60 ശതമാനത്തിലേക്ക് എത്തുന്നതാണ് കെ.എസ്.ഇ.ബിക്ക് പ്രതീക്ഷ നല്‍കുന്നത്. ഗ്രൂപ്പ് രണ്ടില്‍ പെട്ട സംഭരണികളില്‍ 86 ശതമാനവും ഗ്രൂപ്പ് മൂന്ന് സംഭരണികളില്‍ 76 ശതമാനവും വെള്ളമുണ്ട്.
ഷോളയാര്‍ 76 ശതമാനം, കുണ്ടള 58, മാട്ടുപ്പെട്ടി 43, കുറ്റ്യാടി 98, തരിയോട് 94, ആനയിറങ്കല്‍ 40, പൊന്മുടി 86, കല്ലാര്‍കുട്ടി 95, പെരിങ്ങല്‍കുത്ത് 67, ലോവര്‍ പെരിയാര്‍ 97 ശതമാനം എന്നിങ്ങനെയാണ് ജലനിരപ്പ്.
ഞായറാഴ്ച കൂടുതല്‍ മഴ ലഭിച്ചത് കുറ്റ്യാടിയാണ് 6.8 സെ.മീ. കുറവ് ഇടുക്കിയിലും, 1.12 സെ.മീ. ഈ മാസവും കനത്ത മഴ ലഭിക്കുമെന്നാണ് കാലാവസ്ഥാ പ്രവചനം. ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദം കൂടുതല്‍ ശക്തിപ്രാപിക്കുന്നുണ്ട്.
പശ്ചിമഘട്ട മേഖലകളില്‍ മഴ ശക്തിപ്പെടാന്‍ സാധ്യത പ്രവചിക്കുന്നുണ്ട്. കേന്ദ്രപൂളില്‍ നിന്നുള്ള വൈദ്യുതി വിഹിതത്തിലുണ്ടായ കുറവ് നിലനില്‍ക്കുന്നതിനാല്‍ സംസ്ഥാനത്തെ ആഭ്യന്തര ഉത്പാദനം ഉയര്‍ന്നുതന്നെ നില്‍ക്കുകയാണ്. ഉപയോഗം കുറവായിരുന്നിട്ടും 15.1074 ദശലക്ഷം യൂനിറ്റ് ഇന്നലെ രാവിലെ അവസാനിച്ച 24 മണിക്കൂറില്‍ ഉത്പാദിപ്പിച്ചു. 60.1345 ദശലക്ഷം യൂനിറ്റായിരുന്നു ഇന്നലത്തെ ഉപയോഗം.