ന്യൂയോര്‍ക്ക്: നിലവിലെ ലോക ഒന്നും മൂന്നും താരങ്ങളായ ദ്യോകോവിച്ചും ഫെഡററും പരുക്കിലൂടെയും കുഞ്ഞന്‍മാരുടെ അട്ടിമറിയിലൂടെയും ഇടറി വീണിടത്ത് പതറാതെ മുന്നേറിയ നദാല്‍ ഒടുവില്‍ യു.എസ് ഓപ്പണിന്റെ ഫൈനലിലെത്തി കിരീടത്തിന് തൊട്ടരികെ. ഫൈനലില്‍ ആദ്യമായി ഗ്രാന്‍ഡ്സ്ലാം ഫൈനലിലെത്തിയ റഷ്യയുടെ മദ്‌വേദേവാണ് നിലവിലെ ലോക രണ്ടാം നമ്പര്‍ താരത്തിന്റെ എതിരാളി.
ഇന്നലെ നടന്ന സെമിഫൈനലില്‍ നദാല്‍ ഇറ്റലിയുടെ ലോക 25ാം നമ്പര്‍ താരം മാറ്റിയോ ബെറേട്ടിനിയെയാണ് പരാജയപ്പെടുത്തിയത്. സ്‌കോര്‍ 7-6, 6-4, 6-1. ജയത്തോടെ യു.എസ് ഓപ്പണിന്റെ അഞ്ചാം ഫൈനലിലേക്കാണ് താരം ടിക്കറ്റെടുത്തത്. അതേസമയം, സ്വിസ് എക്‌സ്പ്രസിനെ പരാജയപ്പെടുത്തി അത്ഭുത കുതിപ്പുമായെത്തിയ ബള്‍ഗേറിയയുടെ ഗ്രിഗര്‍ ദിമിത്രോവിനെ പരാജയപ്പെടുത്തിയാണ് മദ്‌വേദേവ് കലാശക്കളിക്ക് അര്‍ഹത നേടിയത്. സ്‌കോര്‍ 7-6, 6-4, 6-3.
ടൂര്‍ണമെന്റിലുടനീളം നിലനിര്‍ത്തിയ ഫോം നദാല്‍ സെമിയിലും ആവര്‍ത്തിച്ചു. ആദ്യ സെറ്റ് ടൈബ്രേക്കറിലൂടെ നദാല്‍ സ്വന്തമാക്കിയതോടെ മത്സരം കടുക്കുമെന്നായിരുന്നു ആരാധകരുടെ പ്രതീക്ഷ. എന്നാല്‍, തുടര്‍ന്നുള്ള രണ്ടു സെറ്റിലും ബെറേട്ടിനിക്ക് നദാലിനെ വെല്ലുവിളിക്കാനായില്ല. രണ്ടാം സെറ്റില്‍ ഭേദപ്പെട്ട പ്രകടനമായിരുന്നെങ്കില്‍ മൂന്നാം സെറ്റില്‍ ഇറ്റലി താരം തീര്‍ത്തും നിറംമങ്ങി. നാലാം യു.എസ് ഓപ്പണ്‍ കിരീടത്തിനും കരിയറിലെ 19ാം ഗ്രാന്‍ഡ്സ്ലാമിനുമായാണ് നദാല്‍ ഫൈനലിലിറങ്ങുക.

ദിമിത്രോവും മദ്‌വേദേവും തമ്മില്‍ നടന്ന സെമിയിലെ ആദ്യ സെറ്റില്‍ ടൈബ്രേക്കറിലേക്ക് മത്സരം നീണ്ടു. എന്നാല്‍, തുടര്‍ന്നുള്ള രണ്ട് സെറ്റിലും മദ്‌വേദേവ് കളിയില്‍ മേല്‍ക്കൈ നേടി. ടൂര്‍ണമെന്റിന്റെ തുടക്കം മുതല്‍ കാണികളുമായി ഉടക്കിലായ താരത്തിനെതിരേ കൂവലുകള്‍ പതിവാണെങ്കിലും മത്സരവിജയത്തെ അത് സ്വാധീനിച്ചില്ല.