കുന്നുംകൈ : മലയോരത്ത് തെരുവുനായകളുടെ ശല്യം രൂക്ഷമായി. പെരുമ്പട്ട, കുന്നുംകൈ, മൗക്കോട്, പരപ്പച്ചാല്‍ എന്നിവിടങ്ങളിലാണ് പേ പിടിച്ച നായകളുടെ ശല്യം രൂക്ഷമാകുന്നത്. കഴിഞ്ഞ ദിവസം കടുമേനി ആയന്നൂരിലെ വളര്‍ത്തുമുയലുകളെ തെരുവുനായ്ക്കള്‍ കടിച്ചുകൊന്നു.
ആയന്നൂരിലെ പയ്യേലുമുറിയില്‍ ബേബിയുടെ 12 മുയലുകളെയാണ് കഴിഞ്ഞ ദിവസം രാത്രി കൂടുതുറന്നു തെരുവുനായ്ക്കള്‍ കൊന്നത്. മലയോരത്തെ പല സ്ഥലങ്ങളിലും തെരുവുനായ്ക്കളുടെ ശല്യം രൂക്ഷമായിരിക്കുകയാണ്. പകല്‍സമയത്തുപോലും റോഡുകളിലൂടെ നായ്ക്കള്‍ വിഹരിക്കുകയാണ്. ഇരുചക്രവാഹനങ്ങളിലെ യാത്രക്കാര്‍, കാല്‍നടയാത്രികര്‍, കച്ചവടക്കാര്‍ എന്നിവരെല്ലാം തെരുവുനായ്ക്കളെക്കൊണ്ടു പൊറുതിമുട്ടുകയാണ്.
രാവിലെ മദ്‌റസയിലും ട്യൂഷനും പോകുന്ന കുട്ടികളും വൈകിട്ട് സ്‌കൂളും ഓഫിസും വിട്ടുവരുന്നവരുമാണ് നായ്ക്കളുടെ ആക്രമണത്തിനിരയാകുന്നത്. ഇതുകാരണം സ്‌കൂള്‍ കുട്ടികളുടെ കൂടെ രക്ഷിതാക്കളും പോകേണ്ട സ്ഥിതിയിലാണ്.
തെരുവുനായ്ക്കളെ നിയന്ത്രിക്കേണ്ട തദ്ദേശ ഭരണ സ്ഥാപനങ്ങള്‍ ഇത്തരം വിഷയത്തില്‍ കൈ മലര്‍ത്തുകയാണ്.
അതേസമയം, അറവുശാലകള്‍, കോഴിക്കടകള്‍ എന്നിവയില്‍ നിന്നുള്ള മാലിന്യങ്ങള്‍ തെരുവോരങ്ങളില്‍ തള്ളുന്നതാണ് പലപ്പോഴും തെരുവുനായകളുടെ വംശ വര്‍ധനയ്ക്കു കാരണമെന്ന് നാട്ടുകാര്‍ പരാതിപ്പെടുന്നു.